Zəngilan – Böyük Qayıdışın və milli dirçəlişin rəmzi
Bu gün, 14:40. Yazar: azer
Azərbaycanın qədim yaşayış məskənlərindən biri olan Zəngilan zəngin tarixi, füsunkar təbiəti və strateji əhəmiyyəti ilə ölkəmizin ayrılmaz tərkib hissəsidir. Bu gün Zəngilan şəhəri özündə tarixi yaddaşı, Vətən sevgisini, milli iradəni və Azərbaycanın quruculuq əzmini birləşdirən mühüm rəmzlərdən biri kimi xüsusi məna daşıyır. Oktyabrın 20-də qeyd olunan Zəngilan Şəhəri Günü xalqımızın tarixi qələbəsinin, ərazi bütövlüyümüzün bərpasının və doğma torpaqlara qayıdış arzusunun təntənəsidir.
Zəngilanın taleyi Azərbaycanın müasir tarixinin ən mühüm hadisələri ilə sıx bağlıdır. Ermənistanın hərbi təcavüzü nəticəsində 1993-cü il oktyabrın 29-da işğal edilən rayon uzun illər ərzində doğma sakinlərinin həsrətinə çevrildi. İşğal dövründə Zəngilanın yaşayış məntəqələri, tarixi-mədəni irsi və infrastrukturu ciddi dağıntılara məruz qaldı. Lakin bütün çətinliklərə baxmayaraq, zəngilanlılar doğma yurda qayıtmaq ümidini itirmədilər, Vətənə bağlılıqlarını qoruyub saxladılar.
2020-ci il sentyabrın 27-də başlayan Vətən müharibəsi Azərbaycanın ərazi bütövlüyünün bərpası istiqamətində tarixi dönüş yaratdı. Azərbaycan Ordusunun rəşadəti, əsgər və zabitlərimizin qəhrəmanlığı, xalqımızın birliyi və Ali Baş Komandan İlham Əliyevin qətiyyətli rəhbərliyi sayəsində torpaqlarımız işğaldan azad edildi. 2020-ci il oktyabrın 20-də Zəngilan şəhərinin azad olunması hərbi-strateji baxımdan mühüm əhəmiyyət daşımaqla yanaşı, xalqımızın tarixi ədalətin bərpasına olan inamını daha da gücləndirdi.
Zəngilanın azad edilməsi Azərbaycanın cənub-qərb istiqamətində hərbi-strateji mövqelərinin möhkəmlənməsi baxımından mühüm hadisə idi. Rayonun coğrafi mövqeyi, İranla dövlət sərhədinə çıxışı və regionun nəqliyyat-kommunikasiya imkanları onun geosiyasi əhəmiyyətini artırır. Zəngilanın işğaldan azad olunması ilə Azərbaycan dövlət sərhədinin həmin istiqamətdə nəzarətini bərpa etdi, bölgənin gələcək iqtisadi inkişafı və beynəlxalq nəqliyyat əlaqələrinin genişləndirilməsi üçün yeni imkanlar yarandı.
Zəngilanın dirçəlişi dövlətimizin işğaldan azad edilmiş ərazilərin bərpası və yenidən qurulması siyasətinin mühüm istiqamətlərindən biridir. Prezident İlham Əliyevin rəhbərliyi ilə həyata keçirilən genişmiqyaslı layihələr şəhərin müasir standartlar əsasında yenidən qurulmasını, infrastrukturun bərpasını, iqtisadi potensialın reallaşdırılmasını və əhalinin doğma yurduna qayıdışını hədəfləyir. Yol-nəqliyyat şəbəkəsinin inkişafı, yaşayış məntəqələrinin salınması, sosial obyektlərin inşası və istehsal sahələrinin yaradılması Zəngilanın gələcək inkişafının əsasını təşkil edir.
Rayonun inkişafında Ağalı kəndində həyata keçirilən layihə xüsusi yer tutur. İşğaldan azad edilmiş ərazilərdə müasir yanaşma əsasında qurulan ilk kəndlərdən biri olan Ağalı “ağıllı kənd” konsepsiyasının tətbiqi ilə diqqət çəkir. Burada yaradılan yaşayış və sosial infrastruktur, müasir texnologiyalara əsaslanan xidmətlər Böyük Qayıdışın real nəticələrini nümayiş etdirir. Ağalı təcrübəsi göstərir ki, azad edilmiş torpaqlarda məqsəd yalnız dağıdılmış yaşayış məntəqələrini bərpa etmək deyil, həm də insanlara təhlükəsiz, rahat və müasir həyat şəraiti yaratmaqdır.
Zəngilanın gələcək inkişaf perspektivləri onun təbii sərvətləri, kənd təsərrüfatı imkanları, əlverişli coğrafi mövqeyi və nəqliyyat potensialı ilə də bağlıdır. Rayonun beynəlxalq nəqliyyat dəhlizləri baxımından əhəmiyyəti artdıqca Azərbaycanın regional iqtisadi əlaqələrində oynadığı rolun da genişlənəcəyi gözlənilir. Bu baxımdan Zəngilanın bərpası yalnız yerli əhəmiyyətli layihə deyil, bütövlükdə Azərbaycanın iqtisadi və strateji maraqlarına xidmət edən mühüm dövlət siyasətidir.
Zəngilan Şəhəri Günü həm də şəhidlərimizin müqəddəs xatirəsinə ehtiram günüdür. Bu torpaqların azadlığı uğrunda canlarından keçən qəhrəmanlarımızın fədakarlığı, qazilərimizin şücaəti və xalqımızın sarsılmaz birliyi qələbəmizin mənəvi əsasını təşkil edir. Zəngilanın azadlığı uğrunda aparılan mübarizə bir daha sübut etdi ki, Azərbaycan xalqı öz tarixi torpaqlarına sahib çıxmaq əzmindədir və milli iradəsini heç bir qüvvə sarsıda bilməz.
Bu gün Zəngilan keçmişin ağrılı xatirələrindən gələcəyin quruculuq üfüqlərinə doğru irəliləyir. Şəhərin yenidən qurulması, doğma sakinlərin mərhələli şəkildə geri qayıtması və iqtisadi həyatın canlanması Böyük Qayıdışın mühüm mərhələlərindəndir. Hər yeni yaşayış məntəqəsi, çəkilən yol, tikilən məktəb və yaradılan iş yeri Azərbaycanın öz torpaqlarında sülhü, sabitliyi və davamlı inkişafı təmin etmək əzmini ifadə edir.
Zəngilan Şəhəri Günü xalqımızın qələbə ruhunu, dövlətimizin gücünü və gələcəyə inamını təcəssüm etdirir. Bu əlamətdar gün bizə xatırladır ki, torpaqlarımızın azadlığı milli birliyimizin və qətiyyətimizin nəticəsidir. Zəngilanın dirçəlişi isə Azərbaycanın qarşıya qoyduğu məqsədlərə inamla irəlilədiyinin, işğaldan azad edilmiş ərazilərdə həyatın yenidən canlandığının bariz göstəricisidir.
Zəngilan bu gün azadlığın, dirçəlişin və Böyük Qayıdışın ünvanıdır. Onun yenidən qurulan küçələri, canlanan kəndləri və gələcəyə açılan inkişaf yolları müstəqil Azərbaycanın gücünü, xalqımızın yenilməz ruhunu və dövlətimizin quruculuq iradəsini nümayiş etdirir.
Kamran Əmirov,
YAP Qusar rayon təşkilatının sədri
Geri dön