Makronun Yelisey sarayının altındakı gizli bunkeri – “Qorxu yuvası”nın detalları üzə çıxdı
Bu gün, 21:00. Yazar: vasif
Fransa prezidenti Emmanuel Makronun fövqəladə vəziyyətlərdə istifadə edə biləcəyi yeraltı sığınacaqla bağlı maraqlı məlumatlar yayılıb.
Fransalı jurnalist Florian Tardif Makron ailəsindən bəhs edən kitabında Yelisey sarayının altında yerləşən və “Qorxu yuvası” adlandırılan bunkerin xüsusiyyətlərini təsvir edib.
Rəsmi adı “Post Yupiter” olan sığınacaqda prezident üçün xüsusi kabinet, iki iclas zalı və elektron rabitəni kənar müdaxilələrdən qorumağa xidmət edən Faradey qəfəsi yerləşir.
Müəllifin təsvirinə görə, bunkerin dar dəhlizləri, rütubətli havası və beton divarları burada ağır atmosfer yaradır. Sığınacağı ziyarət edən şəxslərdən biri məkanın insanda qorxu və sıxıntı hissi doğurduğunu bildirib.
Məlumata əsasən, bunker 1970-ci illərdə Fransa prezidenti Valeri Jiskar d'Estenin dövründə yaradılıb.
2018-ci ildə “Sarı jiletlər” etirazları zamanı Makron ailəsinin təhlükəsizlik məqsədilə bu sığınacağa yerləşdirilməsi ehtimalı da nəzərdən keçirilib.
Makronun prezidentliyi dövründə bəzi yüksək səviyyəli təhlükəsizlik toplantılarının burada keçirildiyi bildirilir. Məxfi iclaslara qatılan şəxslərdən mobil telefonlarını girişdə saxlamaq tələb olunur.
Fransada 2026-cı ilin oktyabrında baş verdiyi bildirilən etirazlar fonunda Makronun yenidən bunkerdən istifadə edə biləcəyi iddia edilsə də, onun hazırda sığınacaqda gizləndiyinə dair təsdiqlənmiş məlumat yoxdur.
Geri dön