Dini mərasim faciə ilə bitdi: Özünü buxara verən 68 yaşlı kişi həyatını itirdi
Dünən, 22:00. Yazar: vasif
Malayziyada keçirilən dini festival zamanı qeyri-adi ritual faciə ilə nəticələnib. Kuala Sanqlanq şəhərində Doqquz İmperator Tanrısı festivalına qatılan 68 yaşlı Lim Ba yüksək temperaturlu buxarın təsirinə məruz qaldıqdan sonra həyatını itirib.
“Qara it” ləqəbi ilə tanınan taoist ekstrasens uzun illərdir bədəni və ruhu təmizləmək məqsədilə bu cür mərasimlər həyata keçirirmiş. Məlumata görə, o, təxminən 10 il ərzində oxşar rituallarda iştirak edib.
Hadisə zamanı Lim Ba böyük metal qazanın üzərində yerləşdirilmiş taxta platformada əyləşib. Daha sonra qazanın ağzı polad qapaqla örtülüb və içəridə yüksək temperaturlu buxar yaranıb. Ritual çərçivəsində qazanın içinə qarğıdalı, çörək və düyü kimi ərzaqların da qoyulduğu bildirilir.
Bir neçə dəqiqə sonra qazanın içərisindən qeyri-adi zərbə səsləri eşidilməyə başlayıb. Mərasimdə iştirak edən oğlu atasının verdiyi işarələrin əvvəlkilərdən fərqləndiyini hiss edərək təhlükəli vəziyyət yarandığını anlayıb.
Ətrafdakılar qapağın silkələndiyini gördükdən sonra dərhal müdaxilə ediblər. Qapaq açıldıqda 68 yaşlı kişi huşsuz vəziyyətdə aşkarlanıb. Onun qıcolmalar keçirdiyi bildirilir.
Hadisə yerinə çağırılan tibbi heyətin müdaxiləsinə baxmayaraq, Lim Banın həyatını xilas etmək mümkün olmayıb. Yayılan məlumatlarda onun yüksək temperaturun təsiri nəticəsində infarkt keçirdiyi və bədənində ikinci dərəcəli yanıqlar yarandığı qeyd olunur.
Ailə üzvlərinin sözlərinə görə, Lim Ba bir il əvvəl ağır ürək əməliyyatı keçirib və yüksək qan təzyiqindən əziyyət çəkib. Yaxınları səhhətindəki problemlərə görə onu təhlükəli ritualdan çəkindirməyə çalışsalar da, o, mərasimi davam etdirmək qərarına gəlib.
Qeyd edək ki, taoizm ənənələrində meditasiya və nəfəs məşqləri mühüm yer tutur. Bununla yanaşı, Cənub-Şərqi Asiyanın bəzi yerli dini mərasimlərində köz üzərində gəzmək və yüksək temperatura məruz qalmaq kimi təhlükəli praktikalar da mövcuddur.
Malayziyada baş verən hadisə bu cür mərasimlərin insan sağlamlığı üçün yaratdığı ciddi riskləri bir daha gündəmə gətirib.
Geri dön