Rusiyada tanınmış qəzetin baş redaktorunun evində axtarış – Jurnalist istintaqa aparıldı
Bu gün, 21:00. Yazar: vasif
Rusiyanın müstəqil media qurumlarından biri olan “Novaya qazeta”nın baş redaktoru Sergey Sokolovun yaşadığı evdə hüquq-mühafizə orqanları tərəfindən axtarış aparılıb. Jurnalistin dindirilmək üçün İstintaq Komitəsinə aparıldığı bildirilir.
Məlumata görə, hadisə oktyabrın 15-də baş verib. RBC və Baza nəşrlərinin yaydığı xəbərlərdə Sokolovun evində axtarış keçirildiyi qeyd olunub. “Novaya qazeta” isə günorta saatlarından etibarən baş redaktorla əlaqə saxlaya bilmədiyini açıqlayıb. Onun hüquqlarının müdafiəsi üçün vəkil göndərilib.
İlkin məlumatlara əsasən, axtarış qəzetin əməkdaşı Oleq Rolduqinə qarşı başlanmış cinayət işi ilə əlaqədardır. Jurnalist aprelin əvvəlində şəxsi məlumatların qanunsuz əldə edilməsi və ötürülməsi ittihamı ilə saxlanılıb.
İstintaqın versiyasına görə, Rolduqin jurnalist araşdırmaları zamanı məlumat toplamaq məqsədilə “Şerlok” adlı Telegram botundan istifadə edib. Sözügedən cinayət işi çərçivəsində daha əvvəl “Novaya qazeta”nın redaksiyasında da axtarış aparılıb. Həmin əməliyyatın təxminən 13 saat davam etdiyi bildirilir.
Rolduqin saxlanıldıqdan sonra istintaq təcridxanasına yerləşdirilib, daha sonra barəsində seçilmiş həbs qətimkan tədbiri ev dustaqlığı ilə əvəz olunub.
Baza nəşrinin məlumatına görə, istintaq orqanları Rolduqinin Sokolovla birgə və ya onun göstərişi əsasında hərəkət etmiş ola biləcəyi ehtimalını araşdırır. Lakin bu iddia hələlik təsdiqlənməyib. Baş redaktorun evində aparılan axtarışın hüquqi əsasları ilə bağlı da rəsmi açıqlama verilməyib.
Qeyd edək ki, “Novaya qazeta” sentyabrın əvvəlində Rusiya hakimiyyəti tərəfindən “xarici agent” siyahısına daxil edilib. Qəzetin həmtəsisçisi, Nobel Sülh Mükafatı laureatı Dmitri Muratov da 2023-cü ildə eyni statusla üzləşib. Bundan sonra o, baş redaktor vəzifəsindən ayrılıb və həmin vəzifəyə Sergey Sokolov təyin olunub.
Rusiyanın Ukraynaya genişmiqyaslı hərbi müdaxiləsindən sonra “Novaya qazeta”nın fəaliyyətinə qarşı hüquqi məhdudiyyətlər tətbiq edilib və məhkəmə qərarı ilə nəşrin lisenziyaları ləğv olunub. Buna baxmayaraq, qəzet məhdud imkanlarla jurnalist fəaliyyətini davam etdirir.
Sergey Sokolovla bağlı son hadisə Rusiyada müstəqil media qurumlarının fəaliyyəti və jurnalistlərə qarşı hüquqi tədbirlər ətrafında müzakirələri yenidən gündəmə gətirib.
Geri dön