Eltun Süleymanov:"Bakıdan Vientyana uzanan əməkdaşlıq yolları Azərbaycan və Laos üçün yeni imkanlar deməkdir"
Bu gün, 09:58. Yazar: azer
Dövlətlər arasında münasibətlərin gücü yalnız keçmişdən gələn dostluq ənənələri ilə deyil, həm də gələcək üçün müəyyənləşdirilən məqsədlərlə ölçülür. Azərbaycan ilə Laos arasında münasibətlərin hazırkı mərhələsi bu həqiqəti bir daha təsdiqləyir. Oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri zamanı cənab Prezident İlham Əliyevin səsləndirdiyi fikirlər iki ölkənin mövcud əməkdaşlıq imkanlarını genişləndirmək, iqtisadi əlaqələri canlandırmaq və qarşılıqlı fayda verən yeni layihələr həyata keçirmək niyyətini ortaya qoydu.
Bu sözləri aia.az-a açıqlamasında Eltun Süleymanov deyib.
Müsahibimiz bildirib ki, Bəyanatın diqqətçəkən cəhəti ondan ibarətdir ki, burada əməkdaşlığın perspektivləri ümumi arzular səviyyəsində saxlanılmır, konkret istiqamətlər və mümkün fəaliyyət mexanizmləri ilə əlaqələndirilir. Qəbul olunmuş Birgə Bəyanatın gələcək əməkdaşlığın əsas istiqamətlərini müəyyənləşdirməsi də məhz bu baxımdan əhəmiyyətlidir. İlk növbədə, iqtisadi münasibətlərin genişləndirilməsi xüsusi aktuallıq daşıyır. Cənab Prezident İlham Əliyevin vurğuladığı kimi, hazırkı ticarət dövriyyəsi iki ölkənin potensialını və niyyətini əks etdirmir. Bu yanaşma mövcud vəziyyətin obyektiv qiymətləndirilməsi ilə yanaşı, gələcək üçün aydın istiqamət də müəyyən edir. Siyasi əlaqələr uzun illərdir uğurla inkişaf etdiyi halda, iqtisadi sahədə də eyni dinamikanın əldə olunması üçün daha fəal təşəbbüslərə ehtiyac var. Bakıda keçirilməsi nəzərdə tutulan Laos–Azərbaycan biznes-forumu bu baxımdan mühüm platforma rolunu oynaya bilər. Sahibkarların görüşləri, qarşılıqlı məlumat mübadiləsi, bazar imkanlarının öyrənilməsi və investisiya layihələrinin müzakirəsi iqtisadi münasibətlərin genişlənməsinə şərait yaradacaq. Cənab Prezident İlham Əliyevin Laos tərəfinin təqdim edəcəyi konkret layihələrə Azərbaycanın maraq göstərə biləcəyini bildirməsi əməkdaşlığın praktik məzmununu önə çıxarır. Dövlət başçısının qeyd etdiyi kimi, Azərbaycan sərmayələri tərəfdaş ölkələrdə yeni istehsal sahələrinin formalaşmasına, iş yerlərinin açılmasına və iqtisadi inkişafın sürətlənməsinə xidmət edir. Qarşılıqlı maraqlara əsaslanan layihələr Laosda da istehsal və biznes imkanlarının genişləndirilməsinə, Azərbaycan şirkətləri üçün isə yeni əməkdaşlıq mühitinin yaranmasına kömək edə bilər. Digər mühüm istiqamət nəqliyyat və logistika əlaqələridir. Cənab Prezident İlham Əliyev Azərbaycanın əsas nəqliyyat-logistika layihələrinin artıq reallaşdırıldığını, hazırda diqqətin yeni yük mənbələrinin cəlb edilməsinə və daşımaların həcminin artırılmasına yönəldiyini bildirdi. Laosun qonşu ölkələrlə dəmir yolu bağlantılarının inkişaf etdirilməsi istiqamətində gördüyü işlər də gələcək əməkdaşlıq üçün əhəmiyyətlidir. Həmin layihələr tamamlandıqdan sonra Laosun Trans-Xəzər nəqliyyat marşrutuna çıxış imkanlarının yaranması yükdaşımaların genişləndirilməsi baxımından perspektiv vəd edir. Bu imkanların reallaşması nəqliyyat əlaqələrinin coğrafi baxımdan genişlənməsinə, yeni yük axınlarının formalaşmasına və iqtisadi münasibətlərin daha sıx qurulmasına şərait yarada bilər. Bununla belə, nəticələr hər iki tərəfin infrastruktur layihələrinin tamamlanmasından, logistika həllərinin uzlaşdırılmasından və kommersiya baxımından səmərəli yükdaşımaların təşkilindən asılı olacaq.
Humanitar əlaqələr isə bu tərəfdaşlığın insan amilinə söykənən mühüm istiqamətidir. Vaxtilə iki mindən çox laoslu tələbənin Azərbaycanda təhsil alması ölkələrimiz arasında formalaşmış təhsil ənənəsinin göstəricisidir. Cənab Prezident İlham Əliyevin həmin ənənənin bərpasını təklif etməsi və təqaüd mexanizminin nəzərdə tutulduğunu bildirməsi gənclər arasında əlaqələrin inkişafı üçün yeni imkanlar yaradır. Azərbaycanda təhsil alan laoslu tələbələr gələcəkdə öz ölkələrində müxtəlif sahələr üzrə fəaliyyət göstərərək iki dövlət arasında bilik, təcrübə və mədəniyyət mübadiləsinə töhfə verə bilərlər. Mina təhlükəsi ilə mübarizə də əməkdaşlığın xüsusi əhəmiyyət daşıyan sahəsidir. Azərbaycan işğaldan azad edilmiş ərazilərdə mina təhlükəsinin ağır nəticələri ilə üzləşdiyi kimi, Laos da müharibədən uzun illər keçməsinə baxmayaraq, bu problemin fəsadlarını yaşayır. Energetika, mədənçilik və kənd təsərrüfatı sahələrində müzakirə olunan imkanlar da ikitərəfli münasibətlərin iqtisadi məzmununu genişləndirir. Bu sahələrdə konkret layihələrin müəyyənləşdirilməsi, qarşılıqlı maraqların qiymətləndirilməsi və biznes əlaqələrinin qurulması əməkdaşlığın yeni nəticələr verməsinə şərait yarada bilər.
Azərbaycan ilə Laos arasında diplomatik münasibətlərin 30 ildən artıq tarixə malik olması, beynəlxalq təşkilatlarda qarşılıqlı dəstək, parlamentlərarası əlaqələr və hakim partiyalar arasında əməkdaşlıq gələcək inkişaf üçün etibarlı siyasi zəmin yaradır. Thonqlun Sisulitin Azərbaycana ilk rəsmi səfəri və oktyabrın 15-də nəzərdə tutulan Zirvə görüşündə iştirakı isə bu münasibətlərə əlavə dinamika gətirir. Cənab Prezident İlham Əliyevin bəyanatından aydın görünür ki, Azərbaycan–Laos əməkdaşlığının gələcəyi üçün həm imkanlar, həm də qarşılıqlı iradə var. İndi əsas məsələ bu potensialı iqtisadi tərəfdaşlığa, genişlənən nəqliyyat əlaqələrinə, təhsil və humanitar sahələrdə yeni təşəbbüslərə çevirməkdir-deyə E. Süleymanov fikrini yekunlaşdırıb.
Geri dön