Azərbaycan və Kamboca əməkdaşlığın yeni istiqamətlərini müəyyənləşdirir
Bu gün, 14:33. Yazar: azer
Azərbaycan və Kamboca arasında əlaqələrin perspektivləri təkcə siyasi dialoq və iqtisadi əməkdaşlıqla məhdudlaşmır. Xalqlar arasında qarşılıqlı tanışlığın artırılması, təhsil və mədəniyyət sahələrində münasibətlərin genişləndirilməsi, eləcə də müasir idarəetmə təcrübəsinin bölüşülməsi ikitərəfli tərəfdaşlığın daha da möhkəmləndirilməsində mühüm əhəmiyyət kəsb edir. Cənab Prezident İlham Əliyevin Kambocanın Baş naziri Hun Manetlə görüşündən sonra mətbuata verdiyi bəyanatda təhsil əlaqələrinə və Azərbaycanın dövlət xidmətləri sahəsində qazandığı nailiyyətlərə xüsusi diqqət yetirməsi bu baxımdan diqqətəlayiqdir. Azərbaycanla Kamboca arasında təhsil sahəsində əməkdaşlığın müəyyən tarixi əsasları var. Sovet İttifaqı dövründə yüzlərlə kambocalı tələbənin ölkəmizdə təhsil alması iki dövlət arasında humanitar münasibətlərin inkişafına ilkin zəmin yaradıb. Prezident İlham Əliyevin həmin ənənənin yenidən canlandırılmasının vacibliyini qeyd etməsi göstərir ki, keçmişdə formalaşmış təcrübə yalnız tarixi irs kimi deyil, gələcək əməkdaşlığın inkişafına töhfə verə biləcək mühüm imkan kimi qiymətləndirilir. Təhsil sahəsində qarşılıqlı imkanların genişləndirilməsi gənc nəslin hər iki ölkənin cəmiyyəti, dili, mədəniyyəti və inkişaf yolu haqqında daha ətraflı məlumat əldə etməsinə şərait yarada bilər.
Təhsil istiqamətində əməkdaşlığın əsas üstünlüyü onun uzunmüddətli nəticələrində özünü göstərir. Xarici ölkələrdə təhsil alan gənclər yalnız ixtisas biliklərinə yiyələnməklə kifayətlənmir, eyni zamanda, müxtəlif xalqlar arasında qarşılıqlı anlaşmanın və mədəni əlaqələrin güclənməsinə töhfə verirlər. Azərbaycan və Kamboca universitetləri arasında əməkdaşlığın genişləndirilməsi, tələbə və müəllim mübadiləsinin təşkili, birgə tədris və təlim proqramlarının həyata keçirilməsi bu sahədə praktik nəticələrin əldə olunmasına imkan verə bilər. Diplomatik kadrların hazırlanması istiqamətində əməkdaşlığı nəzərdə tutan sənədin imzalanması da institusional əlaqələrin dərinləşdirilməsi baxımından əhəmiyyətli addımdır. Bu cür təşəbbüslər gələcəkdə dövlət qurumları və müvafiq sahələr üzrə mütəxəssislər arasında təcrübə mübadiləsinin genişlənməsinə şərait yarada bilər.
Belə əməkdaşlıq Azərbaycanın beynəlxalq münasibətlər sahəsində topladığı təcrübənin digər ölkələrlə bölüşdürülməsi baxımından da əhəmiyyətlidir. Ölkəmiz müxtəlif dövlətlərlə tərəfdaşlıq əlaqələrini inkişaf etdirərkən siyasi və iqtisadi maraqlarla yanaşı, idarəetmə, rəqəmsallaşma, insan kapitalının inkişafı və dövlət xidmətlərinin təşkili sahələrində əldə etdiyi nailiyyətləri də təqdim etmək imkanına malikdir. Təhsil və dövlət xidmətləri ilk baxışda fərqli istiqamətlər kimi görünsə də, hər iki sahənin əsasını insan amili təşkil edir. Təhsil insanların bilik və bacarıqlarının inkişafına, peşəkar hazırlığının yüksəldilməsinə xidmət edir. Səmərəli dövlət xidmətləri isə vətəndaşların dövlət institutları ilə münasibətlərini asanlaşdırır, xidmətlərin əlçatanlığını və keyfiyyətini artırır. Bu sahələrdə qarşılıqlı əməkdaşlıq cəmiyyətlərin inkişafına töhfə verməklə yanaşı, dövlətlər arasında qarşılıqlı etimadın və anlaşmanın möhkəmlənməsinə də şərait yaradır. Kamboca ilə əlaqələrin inkişafı da bu baxımdan tərəflərin bir-birinin təcrübəsindən yararlanması və uğurlu yanaşmaları tətbiq etməsi üçün yeni imkanlar formalaşdırır.
Azərbaycan və Kamboca arasında münasibətlərin daha da genişləndirilməsi üçün mövcud tarixi təcrübə, qarşılıqlı maraqlar və yeni institusional əməkdaşlıq imkanları əlverişli əsas yaradır. Prezident İlham Əliyevin bəyanatında səsləndirilən fikirlər göstərir ki, ikitərəfli tərəfdaşlığın möhkəmləndirilməsi yalnız hökumətlər arasında əldə olunan razılaşmalardan deyil, həm də xalqlar arasında əlaqələrin genişləndirilməsindən və faydalı təcrübənin qarşılıqlı paylaşılmasından asılıdır. Təhsil, diplomatik hazırlıq və dövlət xidmətləri sahələrində əməkdaşlığın inkişaf etdirilməsi Azərbaycan-Kamboca münasibətlərinə daha geniş məzmun qazandıra, qarşılıqlı anlaşmanı gücləndirə və gələcək tərəfdaşlıq üçün yeni perspektivlər yarada bilər.
İlqar Kərimov,
YAP Tovuz RayonTəşkilatının sədr müavini
Geri dön