Çin avtomobilləri “Porsche”ni çətin vəziyyətə saldı: İşçilərin 30 faizi ixtisar oluna bilər
Dünən, 22:00. Yazar: vasif
Almaniyanın lüks avtomobil istehsalçısı “Porsche” dünya avtomobil bazarında rəqabətin güclənməsi, xüsusilə Çin markalarının sürətlə irəliləməsi fonunda fəaliyyət modelini dəyişməyə hazırlaşır. Şirkətin yeni strategiyasında genişmiqyaslı xərclərin azaldılması, işçi sayının ixtisarı və daha bahalı avtomobillərin istehsalına üstünlük verilməsi nəzərdə tutulur.
Məlumata görə, “Sportwagenschmiede'35” adlı strategiya çərçivəsində şirkətin ümumi işçi heyətinin 25–30 faiz, rəhbər vəzifələrdə çalışanların sayının isə 40 faiz azaldılması planlaşdırılır. Bu dəyişikliklər həyata keçirilərsə, şirkətin idarəetmə və istehsalat strukturunda ciddi yenilənmə baş verə bilər.
“Porsche” bundan sonra əsas diqqəti satış sayını artırmağa deyil, hər avtomobildən daha yüksək gəlir əldə etməyə yönəltmək niyyətindədir. Yeni yanaşmaya əsasən, bahalı və eksklüziv idman avtomobillərinin ümumi satışlarda payı artırılacaq. Modellərin orta satış qiymətinin təxminən 20 faiz yüksəldilməsi hədəflənir.
Şirkət fərdi sifarişlə hazırlanan avtomobillərə də xüsusi önəm verəcək. Müştərilərin şəxsi zövqünə uyğun dizayn və təchizat imkanları təqdim edən “Sonderwunsch” proqramından əldə olunan gəlirin altı dəfə artırılması qarşıya məqsəd qoyulub.
Dəyişikliklər avtomobil çeşidinə də təsir edəcək. Modellərin müxtəlif versiyalarının sayının 20 faiz azaldılması, bunun hesabına isə hər versiya üzrə orta satış həcminin 30 faiz artırılması gözlənilir. Eyni zamanda D və E seqmentlərinə aid avtomobillərin payının 45 faiz yüksəldilməsi planlaşdırılır.
Yeni strategiyanın əsas istiqamətlərindən biri də xərclərə ciddi nəzarətdir. Plana görə, istehsalatda personal xərcləri 30 faiz, satış və distribusiya xərcləri 20 faiz, yeni modellərin hazırlanmasına ayrılan vəsait 20 faiz, birbaşa material xərcləri isə 10 faiz azaldılmalıdır.
“Porsche”nin baş direktoru Mixael Layters rəhbər heyətin mükafatlandırılması sistemində də dəyişiklik nəzərdə tutulduğunu bildirib. Yüksək vəzifəli şəxslərin illik bonuslarında fərdi fəaliyyət nəticələrindən asılı olan hissənin 10 faizdən 30 faizə yüksəldilməsi planlaşdırılır.
Bütün bu addımlar “Porsche”nin dəyişən avtomobil bazarında rəqabət qabiliyyətini qorumaq və gəlirliliyini artırmaq məqsədi daşıyır. Bununla belə, açıqlanan ixtisar və maliyyə göstəriciləri strategiyada nəzərdə tutulan hədəflərdir; onların hamısının artıq həyata keçirildiyi bildirilmir.
Geri dön