Britaniyada hərbi bazaya gizli daxil olan iki əcnəbi saxlanıldı: Milli təhlükəsizliklə bağlı araşdırma başlanıb
Bu gün, 21:30. Yazar: vasif
Böyük Britaniyada Kral Hərbi Hava Qüvvələrinə məxsus hərbi obyektə qanunsuz daxil olmaqda şübhəli bilinən iki Latviya vətəndaşı saxlanılıb. Hadisə Kembricşir qraflığında yerləşən RAF Molesworth bazasında baş verib.
Məlumata görə, 32 və 36 yaşlı şəxslər oktyabrın 8-nə keçən gecə hərbi bazanın hasarını aşaraq mühafizə olunan əraziyə daxil olublar. Bazanın yaxınlığında park edilmiş şübhəli avtomobil hərbi polisin diqqətini cəlb edib.
İlkin olaraq saxlanılan şəxslər məhdud girişli əraziyə qanunsuz daxil olmaqda və əmlaka ziyan vurmaqda şübhəli biliniblər. Daha sonra araşdırmanın əhatəsi genişləndirilib və onların Böyük Britaniyanın Milli Təhlükəsizlik Qanununu pozmuş ola biləcəkləri də istintaqın predmetinə çevrilib.
Hər iki şübhəlinin Kembricşir polisinin nəzarətində saxlanıldığı bildirilir. Onların hərbi obyektə hansı məqsədlə daxil olduqları hələlik açıqlanmayıb.
Polis hadisənin sentyabrın sonunda Qlosterşirdə yerləşən RAF Fairford bazası yaxınlığında baş vermiş başqa insidentlə ilkin məlumatlara əsasən əlaqəli olmadığını bildirib.
Xatırladaq ki, həmin hadisə ilə bağlı terrorçuluq və partlayıcı maddələr haqqında qanunvericiliyin pozulması şübhəsi ilə beş nəfər saxlanılmışdı. Sonradan onlar müəyyən şərtlərlə sərbəst buraxılmış, yoxlanılan mikroavtobusda isə partlayıcı maddə aşkar edilməmişdi.
Hazırda RAF Molesworth bazasındakı hadisənin bütün halları araşdırılır. Saxlanılan şəxslərin hər hansı xarici dövlətin tapşırığı ilə hərəkət etdiyinə dair təsdiqlənmiş məlumat açıqlanmayıb.
Geri dön