2006–2013-cü illərdə avtomobil alanlara təzminat imkanı: 15 min avroya qədər ödəniş gündəmdə
Bu gün, 19:43. Yazar: vasif
İspaniyada avtomobil bazarında rəqabət qaydalarının pozulması ilə bağlı məhkəmə prosesləri minlərlə nəqliyyat vasitəsi sahibi üçün kompensasiya tələb etmək imkanı yaradıb. Söhbət 2006–2013-cü illərdə müəyyən markalardan yeni avtomobil alan və ya uzunmüddətli icarə müqaviləsi bağlayan şəxslərdən gedir.
Ölkənin rəqabət qurumunun araşdırmaları nəticəsində avtomobil istehsalçıları və dilerlər arasında kommersiya məlumatlarının qanunsuz mübadiləsi və rəqabətə zidd razılaşmalarla bağlı pozuntular müəyyən edilib. İşdə Volkswagen, SEAT, Renault, Peugeot, Citroën, Ford, BMW, Audi, Toyota, Nissan, Opel və Fiat kimi markaların adı çəkilir.
Məlumatlara əsasən, uyğun şəxslər avtomobilin alış qiymətinin 5–15 faizi həcmində təzminat tələb edə bilərlər. Ayrı-ayrı iddialarda kompensasiya məbləğinin 3 500 avrodan 15 min avroya qədər çata biləcəyi bildirilir. Bəzi hallarda bu məbləğə qanuni faizlər də əlavə oluna bilər.
Lakin ödənişlər bütün avtomobil sahiblərinə avtomatik verilmir. Təzminat almaq istəyən şəxslər avtomobilin alış sənədlərini, fakturasını və ya qeydiyyat məlumatlarını təqdim etməli, zəruri hallarda hüquqi prosedurlardan keçməlidirlər.
Ekspertlər müraciət etməzdən əvvəl avtomobilin markasının, alış tarixinin və konkret müqavilənin kompensasiya şərtlərinə uyğunluğunun yoxlanılmasını tövsiyə edirlər. İddia müddətləri də nəzərə alınmalıdır.
Qeyd edək ki, bu təzminat imkanı İspaniya avtomobil bazarında baş vermiş pozuntularla bağlıdır və Azərbaycanda həmin illərdə avtomobil alan şəxslərə avtomatik şamil edilmir. Hər bir müraciət üzrə ödənişin mümkünlüyü və məbləği fərdi qaydada müəyyənləşdirilir.
Geri dön