Avropada məşhur buzlaq yox olmaq üzrədir: Cəmi bir neçə günü qala bilər
Bu gün, 21:21. Yazar: vasif
Sloveniyanın son buzlaqlarından biri olan Triglav tamamilə yox olmaq təhlükəsi ilə üzləşib. Alimlərin fikrincə, buzlaqdan qalan kiçik buz parçaları əlverişsiz hava şəraiti davam edərsə, qısa müddətdə əriyə bilər.
Sloveniyanın ən yüksək zirvəsi olan Triglav dağının şimal-şərq yamacında yerləşən buzlağın sahəsi XIX əsrin sonlarında 40 hektardan çox olub. 1946-cı ildə bu göstərici 14 hektara düşüb, sonrakı onilliklərdə isə ərimə daha da sürətlənib. Hazırda burada yeni buz təbəqəsinin formalaşması demək olar ki, dayanıb.
Buzlağı 30 ildir müşahidə edən coğrafiyaçı Miha Pavşek bildirib ki, qalan buz kütləsinin tamamilə yox olması ehtimalı yüksəkdir. Ötən qış qarın az yağması və qar örtüyünün erkən əriməsi buzun yay istilərinə daha uzun müddət məruz qalmasına səbəb olub.
Problem yalnız Sloveniya ilə məhdudlaşmır. Alp dağlarının digər hissələrində də buzlaqlar sürətlə kiçilir. İsveçrə Alplarında bu il buz həcminin 5,5 faiz azalması qeydə alınıb, son beş ildə isə ümumi itkinin təxminən beşdə birə çatdığı bildirilir.
Mütəxəssislər xəbərdarlıq edirlər ki, Alp buzlaqlarının əriməsi gələcəkdə çayların su ehtiyatlarına, kənd təsərrüfatına və suvarmaya da təsir göstərə bilər. Triglavın yox olması isə Sloveniyada uzun illərdir müşahidə edilən buzlaq dövrünün simvolik sonu ola bilər.
Geri dön