Yəməndə döyüşlər kəskinləşdi: Husilər iqamətgahı ələ keçirdiklərini, Səudiyyəyə zərbələr endirdiklərini bildirirlər
Bu gün, 13:42. Yazar: vasif
Yəməndə “Ənsar Allah” hərəkatı (husilər) Prezident Şurasının sədri Rəşad əl-Alimiyə məxsus Taiz əyalətindəki iqamətgahı nəzarətə götürdüyünü açıqlayıb.
Husilərin hərbi sözçüsü Yəhya Saria oktyabrın 5-də qüvvələrin sözügedən binaya daxil olduğunu göstərdiyi bildirilən görüntülər yayıb. O, Taizdə aparılan əməliyyatlar nəticəsində qarşı tərəfin bir sıra strateji mövqelərdən geri çəkildiyini də iddia edib.
Eyni zamanda, husilər Səudiyyə Ərəbistanındakı bir sıra obyektlərə ballistik raket və pilotsuz uçuş aparatları ilə hücum etdiklərini bildiriblər. Açıqlamada Ər-Riyaddakı Kral Xalid Beynəlxalq Hava Limanı, “Aramco”ya aid neft infrastrukturu, Abha hava limanı və Xamis-Muşeytdəki hərbi obyekt hədəflər sırasında göstərilib.
Qruplaşma həmçinin Məkkə və Mədinə istisna olmaqla, Səudiyyə Ərəbistanının hava məkanını hərbi əməliyyat zonası elan etdiyini açıqlayıb.
Husilərin açıqladığı hədəflərin hamısının vurulması, zərərin miqyası və Taizdəki iqamətgah üzərində tam nəzarətin təmin edilməsi barədə iddiaların müstəqil təsdiqi olmadığı üçün məlumatlar tərəfin açıqlaması kimi qiymətləndirilməlidir.
Geri dön