Türkiyə və Rusiya vətəndaşları evlərini satışa çıxarır: Məşhur kurortda kirayələr ucuzlaşdı
Bu gün, 20:00. Yazar: vasif
Monteneqronun məşhur turizm şəhərlərindən biri olan Budvada daşınmaz əmlak bazarında ciddi dəyişiklik müşahidə olunur. Xüsusilə Türkiyə və Rusiya vətəndaşlarının mülklərini satışa çıxarması mənzil təklifini artırıb, kirayə qiymətlərinin isə aşağı düşməsinə səbəb olub.
Yerli əmlak sektorunun məlumatına görə, əvvəllər aylıq 600-700 avroya kirayəyə verilən birotaqlı mənzillər hazırda 400-500 avro civarında təklif olunur. Beləliklə, bəzi mənzillərdə aylıq kirayə haqqı 100-200 avro ucuzlaşıb.
Bazarda yaranan vəziyyətin əsas səbəbləri sırasında yaşayış icazələri ilə bağlı qaydaların dəyişməsi ehtimalı, viza məsələləri, beynəlxalq sanksiyalar və artan yaşayış xərcləri göstərilir. Bu amillərin xarici vətəndaşların Monteneqroda qalmaq və investisiyalarını davam etdirmək qərarlarına təsir etdiyi bildirilir.
Əmlak məsləhətçisi Tomislav Rankoviçin iddiasına görə, ölkədə yaşayan Türkiyə vətəndaşlarının təxminən 15 faizi artıq Monteneqronu tərk edib. Lakin bu rəqəmin rəsmi miqrasiya statistikası ilə təsdiqlənib-təsdiqlənmədiyi açıqlanmır.
Mülklərini satan əcnəbilərin bir hissəsinin daha aşağı yaşayış və investisiya xərcləri olan ölkələrə üz tutduğu, digərlərinin isə öz ölkələrinə qayıtdığı bildirilir. Əmlak sektorunun nümayəndələri mənzil təklifindəki artım davam edərsə, Budvada qiymətlər üzərində aşağı istiqamətli təzyiqin yaxın aylarda da qala biləcəyini düşünürlər.
Geri dön