Göydəniz Qəhrəmanov: “İqtisadi şaxələndirmə Azərbaycanın resurs potensialının genişləndirilməsinə xidmət edir”
Bu gün, 00:40. Yazar: azer
“Milli iqtisadiyyatın dayanıqlı inkişafı təbii sərvətlərin mövcudluğu ilə yanaşı, onların səmərəli idarə edilməsindən, yeni istehsal sahələrinin yaradılmasından və iqtisadi imkanların düzgün istiqamətləndirilməsindən asılıdır. Müasir dövrdə qlobal bazarlarda baş verən dəyişikliklər ölkələrdən iqtisadiyyatın müxtəlif sahələri arasında tarazlığın qorunmasını, ixrac imkanlarının genişləndirilməsini və yeni gəlir mənbələrinin formalaşdırılmasını tələb edir. Azərbaycan bu istiqamətdə həyata keçirdiyi siyasətlə zəngin resurs potensialını uzunmüddətli inkişaf məqsədlərinə uyğun şəkildə reallaşdırır. Sentyabrın 26-da Bakıda keçirilən II Azərbaycan Beynəlxalq İnvestisiya Forumu çərçivəsində Prezident İlham Əliyevin çıxışında mədən sənayesinin inkişafına xüsusi diqqət yetirilməsi də bu baxımdan əhəmiyyətlidir. Dövlət başçısı bir neçə gün əvvəl bu sahə üzrə Dövlət Proqramının qəbul edildiyini xatırladaraq sənayenin inkişafının ölkənin əsas iqtisadi istiqamətlərindən biri olduğunu vurğulayıb. Proqramın qəbul edilməsi mineral ehtiyatlardan istifadənin sistemli şəkildə təşkilinə, mövcud potensialın iqtisadi dövriyyəyə daha geniş cəlb olunmasına və sahəyə investisiya marağının artmasına zəmin yaradır.”
Millət vəkili Göydəniz Qəhrəmanov bunları aia.az-a açıqlamasında deyib.
Parlament üzvü mədən sənayesinin iqtisadiyyatın bir sıra digər sahələri ilə sıx bağlı olduğunu xüsusi qeyd edib: “Faydalı qazıntıların hasilatı və emalı sənaye istehsalının genişlənməsinə, yeni texnologiyaların tətbiqinə, nəqliyyat və logistika xidmətlərinə tələbatın artmasına təkan verə bilər. Eyni zamanda, bu sahənin inkişafı regionlarda iqtisadi fəallığın yüksəlməsi və yeni məşğulluq imkanlarının yaranması baxımından da əhəmiyyətlidir. Lakin mövcud imkanlardan səmərəli yararlanmaq üçün hasilatla yanaşı, emal mərhələlərinin inkişafı, müasir texnologiyaların tətbiqi və ekoloji tələblərin nəzərə alınması vacibdir. Dövlət Proqramının əhəmiyyəti də məhz ayrı-ayrı təşəbbüslərin vahid inkişaf strategiyası çərçivəsində əlaqələndirilməsində üzə çıxır. Sahənin uzunmüddətli perspektivlərinin müəyyənləşdirilməsi investorlar üçün daha aydın fəaliyyət mühiti formalaşdırır. Bu isə yerli və xarici kapitalın cəlb edilməsi, istehsal güclərinin artırılması və beynəlxalq bazarlara çıxış imkanlarının genişləndirilməsi üçün əlverişli şərait yarada bilər. Azərbaycanın mövcud sənaye təcrübəsi və iqtisadi infrastrukturu həmin hədəflərin reallaşdırılmasına xidmət edən mühüm amillərdir. Bununla yanaşı, ölkənin ənənəvi neft-qaz sektorunun iqtisadi əhəmiyyəti də qorunub saxlanılır. Prezident İlham Əliyevin çıxışında yeni müqavilələrin imzalanmasına diqqət çəkilməsi bu sahənin inkişaf gündəliyindəki prioritetini göstərir. Neft-qaz sənayesi uzun illər ərzində Azərbaycanın iqtisadi imkanlarının genişlənməsində, beynəlxalq tərəfdaşlıqların qurulmasında və dövlətin maliyyə resurslarının artırılmasında mühüm rol oynayıb. Bu təcrübə ölkənin yeni iqtisadi layihələr həyata keçirməsi üçün də əhəmiyyətli baza formalaşdırıb.”
Fikirlərini davam etdirən deputat bunu da deyib ki, ənənəvi enerji sektorunun inkişafı ilə qeyri-neft sahələrinin genişləndirilməsi bir-birini istisna edən istiqamətlər deyil: “Əksinə, neft-qaz sektorunda formalaşan maliyyə, texnologiya və idarəçilik imkanları iqtisadiyyatın digər sahələrinin inkişafına yönəldilə bilər. Burada əsas məqsəd mövcud resurslardan əldə edilən gəlirləri yeni istehsal imkanlarının yaradılması və iqtisadi strukturun şaxələndirilməsi ilə uzlaşdırmaqdır. Belə yanaşma dünya bazarlarında ayrı-ayrı məhsullara tələbatın dəyişməsindən irəli gələn risklərin azaldılmasına da kömək edir. Azərbaycanın iqtisadi siyasətində mədən sənayesinə diqqətin artırılması və neft-qaz sektorunun imkanlarının davamlı şəkildə qiymətləndirilməsi resurs potensialına kompleks yanaşmanın göstəricisidir. Hər iki sahədə investisiyaların təşviqi, istehsalın səmərəliliyinin yüksəldilməsi və ixrac imkanlarının genişləndirilməsi ölkənin iqtisadi mövqelərini möhkəmləndirə bilər. Prezident İlham Əliyevin forumda səsləndirdiyi fikirlər Azərbaycanın təbii sərvətlərini inkişafın mühüm dayağı kimi qorumaqla yanaşı, onların yaratdığı imkanları daha geniş iqtisadi məqsədlərə yönəltmək strategiyasını əks etdirir. Bu strategiyanın ardıcıl həyata keçirilməsi ölkənin sənaye potensialının artmasına, yeni investisiyaların cəlbinə və uzunmüddətli iqtisadi dayanıqlılığın möhkəmlənməsinə xidmət edir” – deyə, Göydəniz Qəhrəmanov fikirlərini tamamlayıb.
Geri dön