Sudan: Vaşinqtonla Xartum arasında diplomatik gərginlik
Bu gün, 13:45. Yazar: vasif
Sudandakı müharibə də BMT Baş Assambleyası çərçivəsində diqqət çəkən məsələlərdəndir. ABŞ Sudanın ordu rəhbəri Əbdülfəttah əl-Burhanın BMT tədbirlərində iştirakına viza məsələsində məhdudiyyət qoyub. Reuters-in məlumatına görə, Vaşinqtonun bu addımı Sudanda 90 günlük atəşkəs təklifinə təzyiq göstərmək cəhdi ilə əlaqələndirilir.
Sudan hökuməti isə ABŞ-ın mövqeyinə etiraz edib və ölkənin suverenliyini müdafiə etdiyini bildirib. Xartum Vaşinqtonun Sudan hökumətinin legitimliyi ilə bağlı açıqlamalarını da qəbul etməyib.
ABŞ Dövlət katibi Marko Rubio Sudandakı müharibənin uzanmasında xarici qüvvələrin roluna diqqət çəkib. Vaşinqtonun mövqeyinə görə, xarici aktorların münaqişənin tərəflərinə dəstəyi dayandırılmadan Sudanda davamlı sülh əldə etmək çətin olacaq.
Sudan böhranının əsas ağırlığı isə ölkə əhalisinin üzərinə düşür. Müharibənin uzanması humanitar vəziyyəti ağırlaşdırır və ölkənin siyasi parçalanması təhlükəsini artırır. Bu səbəbdən BMT-də Sudan məsələsi yalnız Afrika qitəsinin deyil, beynəlxalq diplomatiyanın da ciddi sınaqlarından biri olaraq qalır.
Geri dön