Həftələrlə keçməyən öskürəyə diqqət: Bu xəstəliklərin əlaməti ola bilər
Bu gün, 21:16. Yazar: vasif
Uzun müddət davam edən öskürəyi hər zaman adi soyuqdəymə ilə əlaqələndirmək düzgün deyil. Mütəxəssislər xüsusilə gecə və səhər saatlarında güclənən öskürəyin səbəbinin araşdırılmasını tövsiyə edirlər.
Türkiyəli həkim Esma Seda Akalının sözlərinə görə, böyüklərdə 8 həftədən artıq davam edən öskürək xroniki hesab olunur. Lakin şikayət davam edirsə, müayinə üçün mütləq 8 həftənin tamamlanmasını gözləmək lazım deyil.
Xroniki öskürəyin səbəbləri arasında astma, bəzi infeksiyalar, bronxoektaziya, reflüks, eləcə də burun və sinus problemləri ola bilər. Gecələr və səhərə yaxın artan, soyuq hava və ya fiziki hərəkətlə başlayan öskürək bəzi hallarda astma ilə əlaqəli olur. Astmanın xırıltı və aşkar nəfəs darlığı olmadan, yalnız davamlı öskürəklə özünü göstərən forması da mövcuddur.
Səhərlər bəlğəmli öskürək isə xüsusilə siqaret çəkən şəxslərdə diqqətdən kənarda qalmamalıdır. “Siqaret çəkirəm, öskürək normaldır” yanaşması mümkün tənəffüs yolu xəstəliyinin gec aşkarlanmasına səbəb ola bilər.
Uzunmüddətli öskürəyin səbəbi yalnız əlamətlərə əsasən müəyyən edilmir. Həkim müayinəsi, lazım gəldikdə ağciyər rentgeni və tənəffüs funksiyası testləri aparıla bilər. Nəfəs darlığı, qanlı bəlğəm, sinə ağrısı və ya vəziyyətin sürətlə ağırlaşması kimi əlamətlər olduqda isə tibbi qiymətləndirməni gecikdirməmək vacibdir.
Geri dön