Moskva İrəvanda səfir dəyişikliyinə hazırlaşır? Kopırkinlə bağlı diqqətçəkən iddia
Bu gün, 20:17. Yazar: vasif
Rusiyanın Ermənistandakı səfiri Sergey Kopırkinin diplomatik missiyasını başa vura biləcəyi barədə iddia ortaya çıxıb. Ermənistan mediasının məlumatına görə, Moskvada onun yerinə yeni namizədin müəyyənləşdirilməsi məsələsi nəzərdən keçirilə bilər.
“Hraparak” qəzetinin yazdığına görə, mümkün plan Kopırkinin 2027-ci ilin yanvarınadək vəzifəsini tərk etməsini nəzərdə tutur. Nəşr həmçinin Rusiya və Ermənistandakı müəyyən dairələrdə səfirin fəaliyyətindən narazılıq olduğunu iddia edir.
Qəzetin mənbələri bunu Kopırkinin Ermənistan hakimiyyəti ilə münasibətləri istənilən səviyyədə qura bilməməsi və eyni zamanda Rusiyaya yaxın erməni siyasi dairələri ilə kifayət qədər əlaqə yaratmaması ilə izah edirlər. Hətta Ermənistanda anti-Rusiya əhvalının güclənməsində onun fəaliyyətinin də rol oynadığı iddia olunur.
Kopırkin 2018-ci ilin aprelindən Rusiyanın Ermənistandakı səfiri vəzifəsində çalışır. Mümkün dəyişiklik Ermənistanın Moskvadakı diplomatik təmsilçiliyindəki dəyişikliklə də əlaqələndirilir və qarşılıqlı rotasiya ehtimalı irəli sürülür.
Ancaq Moskva Kopırkinin geri çağırılması və ya yeni səfirin təyin edilməsi barədə hələ rəsmi qərar açıqlamayıb. Diplomat fəaliyyətini davam etdirdiyindən, hazırkı mərhələdə onun dəyişdiriləcəyi barədə məlumat media iddiası olaraq qalır.
Geri dön