Adəm İsmayıl Bakuvi: “Azərbaycan əsgəri qarşıya qoyulan hərbi vəzifələri yüksək əzmkarlıqla yerinə yetirdi”
Bu gün, 17:38. Yazar: azer
“27 sentyabr Azərbaycan xalqının yaddaşında mühüm və xüsusi məna daşıyan tarixlərdən biridir. Bu gün həm Vətən uğrunda canından keçən şəhidlərimizin əziz xatirəsini yad etdiyimiz, həm də xalqımızın keçdiyi çətin, eyni zamanda şərəfli tarixi yol üzərində düşündüyümüz gündür. 2020-ci il sentyabrın 27-də başlayan Vətən müharibəsi Azərbaycanın müasir tarixində yeni mərhələnin əsasını qoydu. 44 gün davam edən döyüşlər nəticəsində uzun illər işğal altında saxlanılan torpaqlarımızın böyük bir hissəsi azad edildi və ölkəmizin ərazi bütövlüyünün bərpası istiqamətində mühüm tarixi nəticə əldə olundu. Anım Günü hər şeydən əvvəl şəhidlərimizin xatirəsinə göstərilən ehtiramın ifadəsidir. Bu tarixdə Vətən naminə həyatını itirmiş qəhrəmanların qarşısında baş əyir, onların fədakarlığını ehtiramla yad edirik. Hər bir şəhidin arxasında doğmalarından ibarət bir ailə, övladlar, valideynlər, yarımçıq qalmış arzular və bütöv bir həyat hekayəsi dayanır. Buna görə də 27 sentyabrı yalnız Vətən müharibəsinin başlandığı gün kimi deyil, həm də şəhidlərimiz qarşısında mənəvi borcumuzu xatırladan xüsusi tarix kimi qiymətləndirmək lazımdır. Prezident İlham Əliyevin də vurğuladığı kimi, Birinci və İkinci Qarabağ müharibələrində şəhid olan soydaşlarımızın əziz xatirəsi xalqımızın yaddaşında və qəlbində daim yaşayacaq.”
Bu fikirləri aia.az-a verdiyi açıqlamasında Vəhdət Partiyasının sədri, ictimai-siyasi xadim Adəm İsmayıl Bakuvi səsləndirib.
Partiya sədri qeyd edib ki, Qarabağ münaqişəsi uzun illər ərzində Azərbaycan xalqının həyatında dərin və ağrılı izlər buraxıb: “Birinci Qarabağ müharibəsindən sonra torpaqlarımız işğala məruz qaldı, yüz minlərlə vətəndaşımız öz doğma yurdlarından didərgin salındı. Azərbaycan uzun müddət ərzində problemin sülh və danışıqlar yolu ilə həllinə çalışdı. BMT Təhlükəsizlik Şurası tərəfindən Azərbaycanın işğal olunmuş ərazilərindən silahlı qüvvələrin çıxarılmasını tələb edən qətnamələr qəbul edildi. Lakin uzun illər ərzində həmin qətnamələrin icrası təmin edilmədi və münaqişənin siyasi yolla həlli mümkün olmadı. Bu müddət ərzində Azərbaycan Ordusunun gücləndirilməsi, ordunun maddi-texniki imkanlarının artırılması və müdafiə qabiliyyətinin yüksəldilməsi istiqamətində ardıcıl tədbirlər həyata keçirildi. Xalqımız da öz torpaqlarının işğalı ilə heç zaman barışmadığını müxtəlif mərhələlərdə nümayiş etdirdi. 2016-cı ilin Aprel döyüşləri, eləcə də 2020-ci ilin iyulunda Tovuz istiqamətində baş verən hadisələr Azərbaycanın ərazi bütövlüyünü qorumaq və müdafiə etmək əzmini bir daha ortaya qoydu. 2020-ci il sentyabrın 27-də cəbhə xətti boyunca başlayan genişmiqyaslı hərbi əməliyyatlar isə Qarabağ münaqişəsinin gedişində əsaslı dəyişiklik yaratdı. Azərbaycan Ordusu əks-hücum əməliyyatına başladı və döyüşlər bütün istiqamətlərdə ağır şəraitdə davam etdi. Müharibə zamanı həm hərbi qulluqçularımız, həm də mülki vətəndaşlarımız arasında itkilər oldu. Buna baxmayaraq, Azərbaycan əsgəri qarşıya qoyulan hərbi vəzifələri yüksək əzmkarlıqla yerinə yetirdi və 44 gün davam edən Vətən müharibəsi Azərbaycanın hərbi-siyasi Qələbəsi ilə başa çatdı.”
Sonda müsahibimiz tarixi Qələbənin əldə olunmasında Azərbaycan Respublikasının Prezidenti, Müzəffər Ali Baş Komandan cənab İlham Əliyevin rəhbərliyini xüsusi qeyd edib: “Müharibə günlərində Prezident İlham Əliyev Ali Baş Komandan kimi hərbi əməliyyatların idarə olunmasına rəhbərlik etməklə yanaşı, beynəlxalq informasiya məkanında Azərbaycanın mövqeyini də ardıcıl şəkildə müdafiə etdi. Onun müxtəlif beynəlxalq media qurumlarına verdiyi müsahibələr və çıxışları Azərbaycanın haqlı mövqeyinin dünya ictimaiyyətinə çatdırılmasında mühüm rol oynadı. Cənab Prezident müharibə dövründə Azərbaycanın əsas məqsədinin öz ərazi bütövlüyünü bərpa etmək olduğunu dəfələrlə bəyan etdi və xalqımızı Qələbəyə inam ətrafında birləşdirdi. Prezident İlham Əliyevin rəhbərliyi ilə dövlətin bütün imkanları Vətən müharibəsinin Qələbə ilə başa çatdırılmasına yönəldildi. Döyüş meydanında Azərbaycan Ordusunun göstərdiyi qəhrəmanlıq, xalqın nümayiş etdirdiyi həmrəylik və dövlət rəhbərliyinin ortaya qoyduğu siyasi iradə bir-birini tamamladı. Böyük itkilər və şəhidlərimizin canı bahasına qazanılan bu Qələbə Azərbaycan tarixinin ən mühüm hadisələrindən biri kimi yadda qaldı. Müharibənin gedişində Cəbrayıl, Füzuli, Zəngilan, Qubadlı və Şuşa şəhərləri, çoxsaylı yaşayış məntəqələri və mühüm strateji yüksəkliklər işğaldan azad edildi. Şuşanın azad olunması Vətən müharibəsinin ən həlledici mərhələlərindən biri oldu. Bunun ardınca Ağdam, Kəlbəcər və Laçın rayonlarının Azərbaycana qaytarılması ilə bağlı proses həyata keçirildi və beləliklə, 2020-ci il 10 noyabr tarixli üçtərəfli bəyanatda nəzərdə tutulan ərazilərin Azərbaycana qaytarılması təmin edildi” – deyə, Adəm İsmayıl Bakuvi fikirlərini tamamlayıb.
Geri dön