Tehranla Əmman arasında söz savaşı: Əraqçidən Səfadiyə sərt suallar
Bu gün, 21:00. Yazar: vasif
İran və İordaniya arasında hərbi əməliyyatlarla bağlı diplomatik polemika kəskinləşib. İranın xarici işlər naziri Seyid Abbas Əraqçi iordaniyalı həmkarı Ayman əs-Səfadinin Tehranın regiondakı hərbi addımlarına dair tənqidlərinə sərt reaksiya verib.
Səfadi İranın müharibənin başlanmasından cəmi iki saat sonra İordaniya və regionun digər ölkələrinə hücum etdiyini bildirərək bunun yalnız cavab əməliyyatı kimi qiymətləndirilə bilməyəcəyini söyləyib.
Əraqçi isə sosial şəbəkədə yayımladığı açıqlamada İordaniya XİN rəhbərinin mövqeyini sual altına alıb. O, İranın hücuma cavab vermək üçün nə qədər gözləməli olduğunu soruşub və ABŞ-nin ilkin zərbələri zamanı ərəb ölkələrinin hava məkanı, ərazisi və akvatoriyasından istifadə edildiyini iddia edib.
Tehranın bu ittihamları region ölkələri üçün xüsusilə həssas məsələdir. İran hərbi əməliyyatların özünümüdafiə xarakteri daşıdığını bildirərkən, İordaniya öz ərazisinin və hava məkanının regional qarşıdurmanın bir hissəsinə çevrilməsinə qarşı çıxır.
Əraqçi-Səfadi polemikası göstərir ki, hərbi qarşıdurmanın təsirləri artıq döyüş meydanı ilə məhdudlaşmır. Tehranla regiondakı ərəb dövlətləri arasında hava məkanından istifadə və hərbi əməliyyatların sərhədləri ilə bağlı fikir ayrılıqları diplomatik münasibətlərdə də yeni gərginlik yaradır.
Geri dön