3 uşaqlı ailələrə aylıq müavinət təklifi: Pensiya yaşı da azaldıla bilər
Bu gün, 12:49. Yazar: vasif
Azərbaycanda üç və daha çox uşağı olan ailələr üçün yeni sosial dəstək mexanizminin tətbiqi təklif olunur. Müzakirə edilən dəyişikliklər çoxuşaqlı ailə anlayışının genişləndirilməsini, aylıq müavinətlərin verilməsini və valideynlərin pensiya yaşının azaldılmasını nəzərdə tutur.
Milli Məclisin deputatı Vüqar Bayramov bildirib ki, hazırda çoxuşaqlı ailə anlayışında nəzərdə tutulan uşaq sayının 5-dən 3-ə endirilməsi ilə bağlı təklif parlamentə təqdim edilib. Buna səbəb son illərdə beş və daha çox uşağı olan ailələrin sayının az olmasıdır.
Təklif qəbul edilərsə, üç və daha çox uşağı olan ailələr çoxuşaqlı ailə kateqoriyasına daxil edilə və hər uşağa görə aylıq dövlət müavinəti almaq hüququ qazana bilərlər.
Digər təklif valideynlərin pensiya yaşı ilə bağlıdır. Üç uşaqlı ailələrdə pensiya yaşının 3 il, dörd uşaqlı ailələrdə 4 il, beş və daha çox uşağı olan ailələrdə isə 5 il azaldılması təklif edilir. Bu imkan müəyyən hallarda analarla yanaşı atalara da şamil oluna bilər.
Deputatın fikrincə, dəyişikliklər həm ailələrin sosial müdafiəsini gücləndirə, həm də ölkədə təbii artımın təşviqinə kömək edə bilər.
Qeyd edək ki, söhbət hələlik təklifdən gedir. Üç uşağı olan bütün ailələrə yeni aylıq müavinətin verilməsi barədə qüvvəyə minmiş qərar yoxdur. Təklif qəbul edilərsə, ödənişlərin məbləği, şərtləri və kimlərə şamil ediləcəyi ayrıca müəyyənləşdirilməlidir.
Geri dön