Manaf Manafov: "ŞƏT Azərbaycan üçün xüsusi əhəmiyyət daşıyan mühüm beynəlxalq əməkdaşlıq platformasıdır"
Bu gün, 11:55. Yazar: azer
Bişkekdə təşkil olunan “ŞƏT plyus” formatlı görüş Azərbaycanın beynəlxalq münasibətlər sistemində fəal, ardıcıl və prinsipial siyasət yürüdən dövlət kimi mövqeyini bir daha nümayiş etdirdi. Sentyabrın 1-də Qırğızıstanın paytaxtında keçirilən bu mühüm tədbirdə Azərbaycan Respublikasının Prezidenti cənab İlham Əliyevin iştirakı və çıxışı ölkəmizin həm Mərkəzi Asiyada, həm türk dünyasında, həm də bütövlükdə geniş Avrasiya coğrafiyasında yüksələn siyasi və diplomatik nüfuzunun növbəti təzahürü oldu.
Bu fikirləri aia.az-a açıqlamasında Nərimanov Rayon Mənzil-Kommunal Təsərrüfatı Birliyinin rəisi, Yeni Azərbaycan Partiyasının üzvü Manaf Manafov deyib.
Fikirlərini davam etdirən hakim partiya təmsilçisi bildirib ki, cənab Prezident İlham Əliyevin Bişkekə səfərinə yalnız beynəlxalq tədbirdə iştirak prizmasından yanaşmaq doğru olmazdı. Bu səfərin əsasını Azərbaycan ilə Qırğızıstan arasında sürətlə möhkəmlənən strateji tərəfdaşlıq, türk dövlətləri arasındakı birliyin daha da güclənməsi və Azərbaycanın mövcud geosiyasi şəraitdə həyata keçirdiyi fəal xarici siyasət təşkil edir. Məhz buna görə də dövlət başçısının çıxışında ilk diqqət yetirdiyi məsələlərdən birinin Qırğızıstanla münasibətlər olması təsadüfi xarakter daşımırdı. Ölkə Prezidenti İlham Əliyev Qırğızıstana əvvəlki səfərini xatırladaraq iki ölkə arasındakı əlaqələrin ən yüksək siyasi səviyyəyə çatdığını bildirdi. Bir ay əvvəl imzalanmış müttəfiqlik münasibətləri haqqında Müqavilənin Azərbaycan-Qırğızıstan əlaqələrində yeni dövr açan mühüm tarixi sənəd olduğu xüsusi vurğulandı. Bu məqam böyük əhəmiyyət daşıyır. Çünki iki ölkə arasındakı münasibətlər artıq təkcə ikitərəfli əməkdaşlıqla məhdudlaşmır, eyni zamanda türk dövlətləri arasında strateji birliyin əsas istiqamətlərindən birinə çevrilir. Bakı və Bişkek arasında mövcud olan yüksək siyasi etimad iqtisadiyyat, nəqliyyat, humanitar sahə və beynəlxalq qurumlar çərçivəsində əməkdaşlığın genişlənməsi üçün əlverişli zəmin yaradır. Cənab Prezident İlham Əliyevin Qırğızıstanın sosial-iqtisadi inkişafını və beynəlxalq arenadakı mövqelərinin güclənməsini xüsusi qeyd etməsi də Azərbaycanın dost və qardaş ölkələrə münasibətdə nümayiş etdirdiyi siyasi və diplomatik yanaşmanın göstəricisidir. Qırğızıstanın 2027–2028-ci illərdə BMT Təhlükəsizlik Şurasının qeyri-daimi üzvü seçilməsi də çıxış zamanı xüsusi diqqətə çatdırıldı. Bu, həm Qırğızıstana verilən siyasi dəstəyin, həm də iki dövlət arasındakı qarşılıqlı etimadın yüksək səviyyəsinin ifadəsidir.
Bişkek görüşünün mühüm məqamlarından biri də Azərbaycanın Cənubi Qafqazda yaratdığı yeni siyasi reallıqların beynəlxalq ictimaiyyətin diqqətinə çatdırılması oldu. Dövlət başçısı çıxışında Azərbaycan və Ermənistan arasında sülh sazişi mətninin paraflanmasını üç onillik davam edən münaqişənin başa çatması baxımından əlamətdar tarixi hadisə kimi dəyərləndirdi. Bununla Prezident İlham Əliyevin beynəlxalq auditoriyaya ünvanladığı əsas mesaj aydın idi: uzun illər münaqişə və qarşıdurma ilə tanınan Cənubi Qafqaz artıq sülhün, əməkdaşlığın və iqtisadi əlaqələrin inkişaf etdiyi məkana çevrilmək istiqamətində irəliləyir. Bu yanaşma Azərbaycanın xarici siyasətində formalaşan yeni mərhələnin əsas xüsusiyyətlərindən biridir. Azərbaycan artıq yalnız keçmiş münaqişənin nəticələrini aradan qaldıran dövlət deyil, həm də regionda sülh və əməkdaşlıq gündəliyinin müəyyənləşdirilməsində fəal rol oynayan əsas siyasi aktorlardan biridir. Cənab Prezidentin Ermənistanla bağlı səsləndirdiyi fikirlər də məhz bu yeni siyasi yanaşmanın mahiyyətini əks etdirirdi. Azərbaycan Ermənistana neft məhsulları tədarük edir, üçüncü ölkələrə məxsus yüklərin öz ərazisindən tranzitinə şərait yaradır, qarşılıqlı ticarətin genişləndirilməsi və yeni nəqliyyat-kommunikasiya xətlərinin açılması istiqamətində addımlar atır. Bu siyasətin mühüm siyasi məzmunu var. Azərbaycan qalib dövlət olaraq regionda yeni gərginlik və qarşıdurma yaratmaq deyil, əksinə, sülhün iqtisadi və praktiki əsaslarını möhkəmləndirmək niyyətini ortaya qoyur.
Fikirlərini davam etdirən müsahibimiz bunu da bildirib ki, Bişkekdəki çıxışın digər mühüm istiqaməti Azərbaycanın beynəlxalq təşkilatlar və beynəlxalq hüquqla bağlı prinsipial mövqeyinin ifadə olunması idi. Cənab Prezident İlham Əliyev BMT Təhlükəsizlik Şurasının 1993-cü ildə qəbul etdiyi dörd qətnamənin uzun müddət yerinə yetirilmədiyini, Azərbaycanın isə nəticə etibarilə öz suverenliyini və ərazi bütövlüyünü öz gücü ilə təmin etdiyini xüsusi vurğuladı. Bu fikirlər yalnız tarixi hadisələrə siyasi qiymət verilməsi anlamına gəlmir. Eyni zamanda beynəlxalq sistemə gələcək üçün mühüm mesaj ünvanlanır: qəbul edilən qərar və qətnamələrin həyata keçirilməsi üçün təsirli və işlək mexanizmlər mövcud olmalıdır. Azərbaycanın bu mövqeyi beynəlxalq hüququn, ədalətli yanaşmanın və çoxtərəfli əməkdaşlıq prinsiplərinin gücləndirilməsinə yönəlmiş çağırışdır. Cənab Prezident İlham Əliyevin Azərbaycanın dörd il Qoşulmama Hərəkatına uğurla sədrlik etdiyini və bundan sonra da çoxtərəflilik prinsiplərinin inkişafına töhfə verməyə davam edəcəyini bildirməsi ölkəmizin beynəlxalq diplomatiyadakı fəaliyyətinin yalnız regional çərçivələrlə məhdudlaşmadığını bir daha göstərir.
Nəticə etibarilə, Bişkekdə keçirilən görüş Azərbaycan diplomatiyasının bir sıra mühüm istiqamətlərini vahid siyasi müstəvidə bir araya gətirdi: qardaş Qırğızıstanla müttəfiqlik münasibətlərinin inkişafı, türk dünyasında həmrəyliyin möhkəmləndirilməsi, Mərkəzi Asiya dövlətləri ilə əməkdaşlığın genişləndirilməsi, Cənubi Qafqazda sülh gündəliyinin irəli aparılması və beynəlxalq münasibətlərdə çoxtərəflilik prinsipinin müdafiəsi. Bişkekdən verilən əsas mesaj mahiyyət etibarilə aydındır: Azərbaycan dəyişən beynəlxalq nizamda prosesləri kənardan izləyən ölkə deyil, baş verən hadisələrə təsir imkanına malik olan, milli maraqlarını qətiyyətlə qoruyan və eyni zamanda regional sülh, sabitlik və əməkdaşlıq təşəbbüslərinə töhfə verən fəal dövlətdir. Bu baxımdan cənab Prezident İlham Əliyevin “ŞƏT plyus” formatında keçirilən görüşdə iştirakı Azərbaycan diplomatiyasının növbəti mühüm və uğurlu siyasi addımlarından biri kimi qiymətləndirilə bilər- deyə, Manaf Manafov açıqlamasını tamamlayıb.
Geri dön