Kreml Paşinyanı seçim qarşısında görür: Ermənistanın Avropa kursu Putinlə masaya yatırılır
Bu gün, 21:00. Yazar: vasif
Rusiya Prezidenti Vladimir Putinlə Ermənistanın Baş naziri Nikol Paşinyanın Bişkekdə keçirəcəyi görüşün əsas mövzularından biri İrəvanın Avropa İttifaqına inteqrasiya planları olacaq. Kremlin mətbuat katibi Dmitri Peskov Moskvanın bu məsələ ilə bağlı mövqeyini Ermənistan rəhbərliyinə bir daha çatdıracağını bildirib.
Peskovun sözlərinə görə, tərəflər Ermənistanın Aİ-yə mümkün üzvlüyünü, bununla bağlı referendum perspektivini və Rusiya-Ermənistan münasibətlərinin gələcəyini müzakirə edəcəklər. Moskva xüsusilə iki ölkə arasında siyasi məsafənin artdığı indiki mərhələdə liderlərin birbaşa dialoqunu vacib sayır.
Kreml sözçüsü Ermənistanın hansı geosiyasi istiqaməti seçəcəyinə Moskvanın qərar verə bilməyəcəyini də etiraf edib. Onun “Biz ermənilərin özlərindən daha çox erməni ola bilmərik” sözləri bu baxımdan diqqət çəkib. Peskov yekun qərarın Ermənistan vətəndaşlarına məxsus olduğunu bildirib.
Moskva Ermənistanın gələcək xarici siyasət kursunun referendum yolu ilə müəyyənləşdirilməsini də məntiqli variant hesab edir. Beləliklə, Kremlin mesajından görünür ki, İrəvanın Avropa istiqamətində atacağı növbəti addımlar Rusiya ilə münasibətlərin gələcək formatına birbaşa təsir göstərə bilər.
Putin-Paşinyan görüşü Ermənistanın bir tərəfdən Avropa İttifaqına yaxınlaşmaq niyyətini açıq şəkildə nümayiş etdirdiyi, digər tərəfdən isə Rusiya ilə mövcud iqtisadi və siyasi əlaqələri qorumağa çalışdığı həssas bir dövrə təsadüf edir. Bu səbəbdən Bişkek danışıqları İrəvanın Moskva ilə Qərb arasında qurmağa çalışdığı balansın növbəti ciddi sınağı hesab olunur.
Geri dön