Norveçdə 35 illik Harald dövrü başa çatdı: Taxta Haakon çıxdı
Bu gün, 18:19. Yazar: vasif
Norveç Kralı V Harald 89 yaşında vəfat edib. Kral Sarayının açıqlamasına görə, monarx avqustun 28-də səhər saatlarında Oslo Universitet Xəstəxanasında dünyasını dəyişib. Onun ölümündən sonra oğlu Haakon Norveç taxtına keçib.
1991-ci ildən ölkənin dövlət başçısı olan V Harald Avropanın hakimiyyətdə olan ən yaşlı monarxı hesab edilirdi. Son illərdə səhhətində ciddi problemlər yaranan kral avqustun 17-dən xəstəxanada müalicə alırdı. Ona hemolitik anemiya diaqnozu qoyulduğu, daha sonra isə qanında bakterial infeksiya aşkarlandığı bildirilmişdi.
Kralın vəfatından sonra Norveçdə matəm ab-havası yaranıb. Kral Sarayının bayrağı yarıya endirilib, çoxsaylı vətəndaşlar sarayın qarşısına gül dəstələri qoyaraq onun xatirəsini yad ediblər.
V Harald üç onillikdən artıq hakimiyyəti dövründə Norveç monarxiyasının müasir simasının formalaşmasında mühüm rol oynayıb. O, xüsusilə 2011-ci il terror hücumlarından sonra birlik və həmrəylik çağırışları, eləcə də tolerantlıq və müxtəlifliyə verdiyi önəmlə yadda qalıb.
Kralın ölümündən sonra 53 yaşlı Haakon avtomatik olaraq taxta çıxıb. Onun qızı İnqrid Aleksandra isə yeni vəliəhd şahzadə olub. Beləliklə, Norveç monarxiyasında 35 il davam edən V Harald dövrü başa çatıb və Haakon dövrü başlayıb.
Geri dön