Yeni səfərbərlik Putin üçün daxili təhlükəyə çevrilə bilər
Bu gün, 18:00. Yazar: vasif
Rusiyada mümkün yeni genişmiqyaslı səfərbərliyin Kremlin qarşısında ciddi daxili problem yarada biləcəyi iddia olunur. Britaniya ordusunun istefada olan polkovniki Həmiş de Bretton-Qordon hesab edir ki, bu dəfə müharibənin təsirləri Rusiyanın daha imkanlı və orta təbəqəsinə də birbaşa toxuna bilər.
Ekspertin fikrincə, indiyədək Ukrayna müharibəsində əsas insan itkisi daha çox Rusiyanın yoxsul regionları, milli azlıqlar, məhbuslar və müqaviləli hərbçilər hesabına kompensasiya edilib. Yeni səfərbərlik isə yüz minlərlə ailəni müharibə ilə birbaşa üz-üzə qoya bilər.
De Bretton-Qordon bu vəziyyəti SSRİ-nin Əfqanıstan müharibəsi ilə müqayisə edir. O xatırladır ki, Əfqanıstandan sovet əsgərlərinin cəsədlərinin tabutlarda geri gətirilməsi zamanla cəmiyyətdə müharibəyə münasibətin dəyişməsinə və narazılığın güclənməsinə təsir göstərmişdi.
Onun qənaətinə görə, oxşar proses Rusiyada da baş verərsə, müharibəni indiyədək nisbətən uzaqdan hiss edən imkanlı ailələrin itkilərlə üzləşməsi ictimai əhval-ruhiyyəyə ciddi təsir göstərə bilər. Bu isə Kremlin müharibəni davam etdirməsini daxili siyasi baxımdan daha çətin və riskli vəziyyətə gətirə bilər.
Geri dön