Koreya səmasında Rusiya təyyarələri göründü – Seul qırıcıları qaldırdı
26-08-2026, 14:13. Yazar: vasif
Rusiya hərbi təyyarələrinin Cənubi Koreyanın hava hücumundan müdafiə identifikasiya zonasına (KADIZ) daxil olması Seulun operativ reaksiyasına səbəb olub. Cənubi Koreya mümkün risklərə qarşı döyüş təyyarələrini havaya qaldırıb.
Hadisə Dokdo və Ulleung adaları yaxınlığında qeydə alınıb. Cənubi Koreya hərbçilərinin məlumatına görə, Rusiya təyyarələri zonada qısa müddət qaldıqdan sonra ərazini tərk ediblər.
Cənubi Koreya Silahlı Qüvvələri Rusiya təyyarələrinin yaxınlaşmasını əvvəlcədən müəyyən etdiklərini və mümkün gözlənilməz vəziyyətə hazırlıq məqsədilə qırıcıların havaya qaldırıldığını açıqlayıb.
Bununla belə, Seul mühüm məqama aydınlıq gətirib: Rusiya hərbi təyyarələri Cənubi Koreyanın suveren hava məkanına daxil olmayıb.
Hava hücumundan müdafiə identifikasiya zonası ölkənin ərazi hava məkanı ilə eyni anlayış deyil. Belə zonalar yaxınlaşan xarici təyyarələrin əvvəlcədən müəyyənləşdirilməsi və potensial təhlükələrin vaxtında qiymətləndirilməsi məqsədi daşıyır.
Geri dön