Paşinyanın KTMT oyununun pərdəarxası – İrəvan niyə özü çıxmaq istəmir?
Bu gün, 18:00. Yazar: vasif
Ermənistanın baş naziri Nikol Paşinyanın KTMT-dən xaric ediləcəkləri halda bundan “çox məmnun” olacağını deməsi İrəvanın Moskva ilə münasibətlərində yeni müzakirələr yaradıb. Paşinyan bildirib ki, Ermənistanın təşkilata marağı tükənib və yaxın beş ildə KTMT-də fəaliyyətini bərpa etmək planlaşdırılmır.
Kreml isə məsuliyyəti İrəvanın üzərinə qoyub. Rusiya prezidentinin sözçüsü Dmitri Peskov bildirib ki, Ermənistan KTMT-yə ehtiyac duymursa, təşkilatdan çıxmaq barədə özü qərar verə bilər.
Ermənistan 2024-cü ildən KTMT-də fəaliyyətini faktiki dondurub və üzvlük haqlarının ödənilməsini dayandırıb. Buna baxmayaraq, İrəvan indiyədək təşkilatdan rəsmən çıxmaq proseduruna başlamayıb.
Bunun səbəblərindən biri siyasi manevr imkanlarını qorumaq ola bilər. Ermənistan KTMT üzvlüyünü formal şəkildə saxlayaraq həm Moskva, həm də Qərblə münasibətlərində bu məsələdən əlavə siyasi alət kimi istifadə edə bilir. Digər tərəfdən, rəsmi çıxış zamanı ödənilməmiş üzvlük haqları və təşkilat qarşısındakı maliyyə öhdəlikləri də gündəmə gələ bilər.
KTMT-dən mümkün çıxış Rusiyanın Gümrüdə yerləşən 102-ci hərbi bazasının avtomatik bağlanması demək deyil. Bazanın fəaliyyəti ayrıca dövlətlərarası sazişlə tənzimlənir. Ermənistan eyni zamanda Avrasiya İqtisadi İttifaqında qalaraq Rusiya ilə mühüm iqtisadi əlaqələrini qorumağa davam edir.
Beləliklə, Paşinyanın “bizi xaric etsələr, sevinərəm” mesajı təkcə KTMT-dən narazılıq kimi görünmür. İrəvan təşkilatdan özü çıxmaq əvəzinə məsuliyyəti qarşı tərəfin üzərinə ötürməklə həm mümkün maliyyə-hüquqi məsələlərdə, həm də Moskva-Qərb balansında özünə daha geniş manevr sahəsi saxlamağa çalışır.
Geri dön