İrəvandan Xankəndi ilə bağlı SƏRT MESAJ – Qarabağa qayıdış məsələsi bağlanır?
Bu gün, 19:47. Yazar: vasif
Ermənistanda Qarabağı tərk etmiş ermənilərin mümkün qayıdışı ətrafında müzakirələr yenidən siyasi gündəmə gəlib. Hakimiyyət nümayəndələrinin son açıqlamaları göstərir ki, rəsmi İrəvan bu məsələni dövlət siyasətinin hədəfinə çevirmək niyyətində deyil və diqqəti Azərbaycanla uzunmüddətli sülhün qurulmasına yönəltmək istəyir.
Ermənistan parlamentinin rəhbərliyində təmsil olunan Ruben Rubinyan bildirib ki, hakimiyyət Qarabağdan Ermənistana köçmüş ermənilərin geri qayıtmasını dövlət məqsədi kimi dəstəkləmir. Onun fikrincə, belə bir siyasətin formalaşdırılması Ermənistan–Azərbaycan münaqişəsinin məntiqini yenidən gündəmə gətirə bilər. Rubinyan əsas məqsədin mövcud reallıqları qəbul etmək və uzunmüddətli sülhə nail olmaq olduğunu vurğulayıb.
Hakim “Vətəndaş Müqaviləsi” Partiyasının deputatı Sarqis Xandanyan isə məsələni gündəmdə saxlayan müxalifət nümayəndələrinə sərt reaksiya verib. O, Qarabağ mövzusunu davamlı şəkildə qabardan siyasətçilərə müraciətlə bildirib: “Madam Qarabağı bu qədər çox sevirsiniz, orta məktəblərin dərdini çəkirsiniz, o zaman Xankəndidə qalıb, orada uşaqlarınızı niyə məktəbə göndərmədiniz?”
Baş nazir Nikol Paşinyan da əvvəlki açıqlamalarında Qarabağ ermənilərinin qayıdışı məsələsinə münasibətini ortaya qoyaraq Ermənistanın gələcəyinin mövcud beynəlxalq səviyyədə tanınmış sərhədlər daxilində qurulmasına üstünlük verdiyini bildirib. Buna baxmayaraq, Ermənistan müxalifətinin müəyyən hissəsi və keçmiş separatçı strukturlarla əlaqəli şəxslər Qarabağ mövzusunu siyasi gündəmdə saxlamağa çalışırlar.
2026-cı ildə açıqlanan məlumatlar Qarabağdan Ermənistana köçmüş şəxslərin əhəmiyyətli hissəsinin artıq Ermənistan vətəndaşlığı aldığını göstərir. Təqdim olunan rəqəmlərə əsasən, onların təxminən 40 min nəfəri Ermənistan vətəndaşlığını qəbul edib. Bu proses həmin şəxslərin Ermənistandakı hüquqi statusunun tədricən dəyişdiyini göstərən mühüm amillərdən biri hesab edilə bilər.
Bununla belə, qayıdış mövzusunun siyasi müzakirələrdən tamamilə çıxacağını söyləmək hələ tezdir. Azad Vətən Partiyasının sədri Akif Nağının fikrincə, məsələ Ermənistan daxilindəki müəyyən siyasi dairələr, xaricdə fəaliyyət göstərən erməni təşkilatları və ayrı-ayrı beynəlxalq aktorlar tərəfindən uzun müddət gündəmdə saxlanıla bilər.
Akif Nağı hesab edir ki, Qarabağdan köçmüş ermənilər mövzusu gələcəkdə Azərbaycana siyasi təzyiq vasitəsi kimi istifadə edilməyə çalışıla bilər. Onun sözlərinə görə, Ermənistan daxilindəki bəzi qrupların və xaricdə fəaliyyət göstərən erməni mərkəzlərinin məsələni vaxtaşırı gündəmə gətirməsi də bunun göstəricisidir.
Partiya sədri Azərbaycanın belə təşəbbüsləri diqqətlə izləməsinin vacibliyini vurğulayıb. Onun fikrincə, Qarabağ məsələsi ətrafında irəli sürülən iddialara qarşı hüquqi, tarixi və siyasi faktlara əsaslanan arqumentlər ortaya qoyulmalı, mövzunun yenidən qarşıdurma vasitəsinə çevrilməsinə imkan verilməməlidir.
Beləliklə, Ermənistan hakimiyyətinin son bəyanatları Qarabağa qayıdışı rəsmi dövlət məqsədi kimi gündəmdən çıxarmaq xəttinin gücləndiyini göstərir. Ancaq bu, mövzunun siyasi və beynəlxalq müstəvidə birdəfəlik bağlandığı anlamına gəlmir. İrəvandakı müxalif qüvvələrin və xaricdəki erməni təşkilatlarının gələcəkdə məsələni yenidən gündəmə gətirmək cəhdləri istisna edilmir.
Geri dön