TƏCİLİ! İranın Avropaya zərbə təhdidi Yunanıstanı HƏRƏKƏTƏ KEÇİRDİ – “Patriot”lar hazır vəziyyətə gətirilir
Bu gün, 18:42. Yazar: vasif
İranın mümkün hərbi qarşıdurma zamanı Avropadakı ABŞ hərbi obyektlərinin hədəfə alına biləcəyi barədə xəbərdarlıqlarından sonra Yunanıstan təhlükəsizlik tədbirlərini gücləndirməyə hazırlaşır.
Məlumata görə, Afina Krit adasında yerləşən və ABŞ üçün Aralıq dənizində strateji əhəmiyyət daşıyan Souda hərbi-dəniz bazasının müdafiəsini gücləndirməyi nəzərdən keçirir.
Bu məqsədlə Yunanıstan Silahlı Qüvvələrinin arsenalındakı “Patriot” zenit-raket komplekslərindən birinin Souda bazası ətrafına yerləşdirilməsi variantı gündəmə gəlib. Məqsəd mümkün raket və digər hava təhdidlərinə qarşı bazanın müdafiə imkanlarını artırmaqdır.
Söhbət mart ayında Yunanıstanın Karpatos adasında yerləşdirilmiş “Patriot” sistemindən gedir. Mövcud plan reallaşarsa, həmin kompleks Kritə köçürülərək Souda bazasının hava hücumundan müdafiəsinin gücləndirilməsində istifadə edilə bilər.
Souda bazası coğrafi mövqeyinə görə Şərqi Aralıq dənizi və Yaxın Şərq istiqamətində mühüm strateji məntəqələrdən hesab olunur. Buradakı hərbi infrastrukturdan ABŞ və NATO qüvvələrinin müxtəlif əməliyyat və logistika fəaliyyətlərində istifadə edilir.
Yunanıstanın mümkün addımı İran ətrafında artan hərbi-siyasi gərginliyin artıq Yaxın Şərqin sərhədlərindən kənarda da təhlükəsizlik hesablamalarına təsir göstərdiyini nümayiş etdirir. Afina hələlik mümkün hücumun baş verəcəyini deyil, yaranmış risklər fonunda strateji obyektin müdafiəsini gücləndirmək variantını nəzərdən keçirir.
Geri dön