Oteldə dəhşətli yanğın: 9 nəfər öldü, ölənlər arasında 4 yaşlı uşaq da var
Bu gün, 17:15. Yazar: vasif
Hindistanın Kolkata şəhərinin mərkəzində yerləşən çoxmərtəbəli binada gecə saatlarında güclü yanğın baş verib. Hadisə nəticəsində azı 9 nəfər həyatını itirib, 6 nəfər isə yaralanıb. Ölənlər arasında 4 yaşlı uşaq da var.
Yanğın avqustun 19-na keçən gecə, yerli vaxtla təxminən saat 02:00-da Mirza Qalib küçəsində yerləşən və bir neçə otelin fəaliyyət göstərdiyi beşmərtəbəli binada başlayıb. Hadisə yerinə yanğınsöndürənlər, polis və fövqəladə xidmət əməkdaşları cəlb olunub. Təxminən 80 nəfərin binadan xilas edildiyi bildirilir.
Həlak olanlar arasında Banqladeş vətəndaşlarının olduğu təsdiqlənib. İlkin məlumatlara görə, onların bir hissəsi müalicə məqsədilə Hindistana gəlmişdi. Banqladeşin Kalkuttadakı diplomatik nümayəndəliyi ölənlərdən bir neçəsinin vətəndaşlığının müəyyənləşdirildiyini, digər şəxslərlə bağlı yoxlamaların davam etdiyini açıqlayıb.
Yanğının hansı səbəbdən başladığı hələ rəsmən yekunlaşdırılmayıb. İlkin ehtimallar arasında elektrik sistemində qısaqapanma göstərilir. Binadakı dar çıxışlar və zəif havalandırmanın insanların təxliyəsini çətinləşdirdiyi də bildirilir.
Hadisə ilə bağlı araşdırma başlanıb. Hüquq-mühafizə və yanğın təhlükəsizliyi qurumları binada təhlükəsizlik normalarına əməl olunub-olunmadığını da yoxlayırlar.
Geri dön