Türkiyədə müəmmalı dron hadisəsi: PUA polis idarəsinin ərazisinə düşdü
Bu gün, 12:00. Yazar: vasif
Türkiyənin Trabzon vilayətinin Arsin rayonunda mənşəyi hələ müəyyənləşdirilməyən pilotsuz uçuş aparatı polis idarəsinin ərazisinə düşüb.
Hadisə barədə Trabzon Böyükşəhər Bələdiyyəsinin sədri Əhməd Metin Gənc məlumat verib. Onun açıqlamasına görə, dronun birbaşa hüquq-mühafizə orqanlarına aid ərazidə aşkarlanması təhlükəsizlik qüvvələrini hərəkətə keçirib.
İlkin məlumatlara əsasən, hadisə nəticəsində ölən və ya xəsarət alan olmayıb. Polis ərazidə təhlükəsizlik tədbirlərini gücləndirib, pilotsuz aparat isə araşdırılması üçün mütəxəssislər tərəfindən nəzarətə götürülüb.
Hazırda istintaqın əsas məqsədi PUA-nın haradan havaya qalxdığını, kimə məxsus olduğunu və hansı səbəbdən polis idarəsinin ərazisinə düşdüyünü müəyyənləşdirməkdir. Dronun texniki nasazlıq nəticəsində qəzaya uğraması, yoxsa başqa səbəbin olması barədə rəsmi versiya hələ açıqlanmayıb.
Türkiyədə mənşəyi müəyyən edilməyən pilotsuz aparatların aşkarlanması daha əvvəl də qeydə alınıb. İyun ayında ölkənin çimərliklərindən birində dron qalıqlarının tapıldığı və ekspertiza məqsədilə Ankaraya göndərildiyi bildirilmişdi.
2026-cı ilin fevralında isə Türkiyə Müdafiə Nazirliyi ilkin qiymətləndirmələrə əsasən Rusiyaya məxsus olduğu ehtimal edilən pilotsuz aparatın aşkarlandığını açıqlamışdı.
Trabzondakı son hadisənin əvvəlki insidentlərlə əlaqəsinin olub-olmadığı məlum deyil. Dronun mənşəyi və uçuş məqsədi aparılan araşdırmanın nəticələrindən sonra aydınlaşacaq.
Geri dön