Almaniyadan ukraynalı kişilərlə bağlı yeni qərar: Müvəqqəti qoruma almaq çətinləşir
Dünən, 23:03. Yazar: vasif
Almaniyada hərbi xidmət öhdəliyi olan 23-60 yaşlı ukraynalı kişilərin müvəqqəti qoruma statusu alması ilə bağlı prosedurun dəyişdirildiyi bildirilir. Yeni qaydalar ölkəyə gələn bəzi Ukrayna vətəndaşlarından əlavə sənədlərin təqdim edilməsini tələb edir.
Almaniya Daxili İşlər Nazirliyinin açıqlamasına əsasən, dəyişiklik 31 iyul 2026-cı ildən sonra ölkəyə gələn və hərbi xidmət yaşında olan ukraynalı kişilərə şamil ediləcək.
Yeni prosedura əsasən, müvəqqəti qoruma almaq istəyən şəxslər Ukraynanı qanuni əsaslarla tərk etdiklərini və ya hərbi xidmətdən rəsmi şəkildə azad olunduqlarını təsdiqləyən sənədlər təqdim etməlidirlər. Daha əvvəl Almaniyada müvəqqəti qoruma statusu əldə etmiş şəxslərin isə yeni qaydalardan təsirlənməyəcəyi bildirilir.
Almaniya tərəfi eyni zamanda Ukraynada hərbi xidmət öhdəliyinin mövcud olmasının avtomatik olaraq qaçqın statusunun verilməsi üçün kifayət etmədiyini vurğulayıb. Ölkədə qanuni yaşayış əsası olmayan Ukrayna vətəndaşlarının deportasiya ilə üzləşə biləcəyi də qeyd olunur.
Dəyişiklik Avropa İttifaqının ukraynalılar üçün tətbiq etdiyi müvəqqəti qoruma mexanizmi fonunda gündəmə gəlib. Bu rejim Ukraynadan gedən şəxslərə Aİ ölkələrində qanuni yaşamaq və işləmək imkanı verir.
Yeni yanaşmada isə hərbi xidmət yaşında olan və sonradan Aİ ərazisinə gələn kişilərin statusuna daha fərdi qaydada baxılması nəzərdə tutulur. Hansı sənədlərin tələb ediləcəyini isə hər bir üzv dövlət öz prosedurlarına uyğun müəyyənləşdirəcək.
Beləliklə, dəyişiklik daha əvvəl müvəqqəti qoruma əldə etmiş bütün ukraynalılara deyil, yeni gələn hərbi xidmət yaşlı kişilərə təsir göstərəcək. Onlar Almaniyada hüquqi status əldə etmək üçün Ukraynadan çıxışlarının qanuniliyini və hərbi xidmətlə bağlı vəziyyətlərini sənədlərlə əsaslandırmalı olacaqlar.
Geri dön