Polşadan müharibə hazırlığı kimi görünən addım: Tanklar üçün 120 milyon dollarlıq strateji körpü
Dünən, 21:49. Yazar: vasif
Ukraynada müharibənin davam etdiyi bir vaxtda qonşu Polşa hərbi logistika imkanlarını genişləndirəcək yeni strateji infrastruktur layihəsinə hazırlaşır. Ölkənin Şetsin şəhərində ağır hərbi texnikanın daşınmasına imkan verəcək xüsusi körpünün tikilməsi planlaşdırılır.
Odra çayı üzərində inşa ediləcək Kłodny körpüsü ikili təyinatlı olacaq. Layihə gündəlik həyatda şəhər nəqliyyatına xidmət etsə də, müharibə və fövqəladə vəziyyət zamanı hərbi məqsədlər üçün istifadə edilə biləcək. Polşa hakimiyyəti məhz bu xüsusiyyətinə görə layihəyə strateji əhəmiyyət verir.
Körpünün konstruksiyası tanklar, zirehli transportyorlar və digər ağır hərbi texnikanın təhlükəsiz keçidinə uyğunlaşdırılacaq. Böhran vəziyyətində hərbi texnikanın Şetsin limanından ölkənin digər istiqamətlərinə və əks marşrut üzrə sürətli daşınması mümkün olacaq.
Şetsin limanının körpünün nəzərdə tutulduğu ərazidən cəmi bir neçə yüz metr uzaqda yerləşməsi layihənin hərbi-logistik əhəmiyyətini artırır. Zərurət yaranacağı halda liman NATO müttəfiqlərinin texnikasının və digər hərbi yüklərin qəbul edilərək quru yolu ilə daşınmasında mühüm məntəqəyə çevrilə bilər.
Sülh dövründə isə körpü şəhərin normal nəqliyyat sisteminin bir hissəsi olacaq. Yeni keçidin avtomobil yollarındakı sıxlığı azaltması, həmçinin tramvay xətlərinin fəaliyyətinə şərait yaratması planlaşdırılır. Beləliklə, yüz milyonlarla dollarlıq obyekt həm mülki, həm də müdafiə infrastrukturu funksiyasını yerinə yetirəcək.
Layihənin ümumi dəyəri təxminən 450 milyon zloti, yəni 120 milyon dollar həcmində qiymətləndirilir. Şetsin rəhbərliyi tikintinin maliyyələşdirilməsi üçün Polşa dövlət büdcəsi ilə yanaşı, Avropa fondlarından da vəsait cəlb etməyə çalışır.
Körpünün inşasının üç ildən artıq müddətdə tamamlanması nəzərdə tutulur. Ukraynadakı müharibə və Avropada təhlükəsizlik arxitekturasının dəyişməsi fonunda Polşanın belə infrastruktura sərmayə yatırması Varşavanın mümkün böhran vəziyyətlərinə əvvəlcədən hazırlaşdığını göstərən addımlardan biri kimi qiymətləndirilir.
Geri dön