Putinin büstünün “ömrü” cəmi 6 saat çəkdi – Başını kəsib apardılar
Bu gün, 19:19. Yazar: vasif
Danimarkanın Orhus (Aarhus) şəhərində Rusiya Prezidenti Vladimir Putinin büstü quraşdırıldıqdan cəmi bir neçə saat sonra naməlum şəxslər tərəfindən dağıdılıb. Büstün başı kəsilərək hadisə yerindən aparılıb.
Putinin büstü şəhərin Universitet Parkında yerləşdirilmişdi. Məlumata görə, abidə burada cəmi 6 saat qala bilib. Daha sonra onun başının kəsildiyi və yoxa çıxdığı müəyyən edilib. Büstün qalan hissəsini bələdiyyə əməkdaşı taparaq layihəni həyata keçirən radiostansiyaya təhvil verib.
Maraqlıdır ki, büst dövlət qurumunun təşəbbüsü ilə qoyulmuş abidə olmayıb. O, Danimarkanın RADIO IIII radiostansiyasının dünyada siyasi, iqtisadi və mədəni təsirə malik şəxslərlə bağlı hazırladığı layihənin bir hissəsi kimi quraşdırılıb. Radiostansiya layihənin həmin şəxsləri tərifləmək məqsədi daşımadığını, əksinə, hakimiyyət və təsir anlayışı ətrafında ictimai müzakirə yaratmaq istədiyini bildirib.
Layihə çərçivəsində yalnız Putinin deyil, İsrailin baş naziri Benyamin Netanyahunun, Danimarkanın baş naziri Mette Frederiksenin, iş adamı İlon Maskın və Kim Kardaşyanın da büstləri müxtəlif şəhərlərdə ictimai məkanlara yerləşdirilib.
Ancaq ən qalmaqallı aqibət Putinin büstünün başına gəlib. Quraşdırılmasından təxminən altı saat sonra büstün başı kəsilərək aparılıb və hazırda onun harada olduğu məlum deyil.
Radiostansiya hadisədən sonra ictimaiyyətə müraciət edərək Putinin büstünün itkin düşən başının tapılması üçün məlumat istəyib. Hadisəni törədən şəxsin və ya şəxslərin kimliyi barədə hələlik məlumat açıqlanmayıb.
Beləliklə, ictimai müzakirə yaratmaq məqsədilə başladılan layihə Putinin büstünün cəmi bir neçə saat ərzində başsız qalması ilə Danimarkada gözlənilməz qalmaqala çevrilib.
Geri dön