Tramp FİFA prezidentinə arxa çıxdı: “Onu dəyişmək dəhşətli səhv olar”
Bu gün, 19:22. Yazar: vasif
ABŞ Prezidenti Donald Tramp Beynəlxalq Futbol Assosiasiyaları Federasiyasının (FİFA) prezidenti Canni İnfantinoya açıq dəstəyini ifadə edib. Ağ Ev rəhbəri hesab edir ki, İnfantinonun FİFA rəhbərliyindən uzaqlaşdırılması qurum üçün ciddi səhv olardı.
Donald Tramp bu barədə “Truth Social” hesabında paylaşım edib. ABŞ Prezidenti FİFA-nın hazırkı rəhbərinin fəaliyyətini yüksək qiymətləndirərək onun təşkilatın uğurlarında mühüm rol oynadığını bildirib.
“Əgər FİFA hər hansı səbəbdən prezidenti Canni İnfantinonu əvəz etməyi düşünsəydi, dəhşətli səhvə yol verərdi. O, əladır”, – Tramp qeyd edib.
ABŞ lideri İnfantinonun rəhbərliyi dövründə keçirilən dünya çempionatlarının kommersiya və təşkilati uğurlarına da toxunub. Trampın sözlərinə görə, İnfantinonun rəhbərlik etdiyi Dünya Kuboku əvvəlkilərlə müqayisədə dəfələrlə daha uğurlu olub.
Tramp gələcək dünya çempionatları ilə bağlı daha iddialı fikir səsləndirib. O bildirib ki, İnfantinonun FİFA-dan getməsi turnirlərin gələcək uğurlarına və gəlirliliyinə ciddi təsir göstərə bilər.
ABŞ mediasında isə son həftələr İnfantino ilə Tramp arasındakı münasibətlər barədə müxtəlif məlumatlar yayılır. “New York Post” iyulun sonunda Trampın İnfantinonu gələcəkdə BMT-nin Baş katibi postunda görmək istədiyini iddia edib.
Nəşrin məlumatına görə, İnfantinonun ABŞ Prezidenti ilə münasibətləri ABŞ, Kanada və Meksikanın ev sahibliyi etdiyi 2026-cı il Dünya Kuboku dövründə daha da yaxınlaşıb.
Avqustun əvvəlində “New York Post” İnfantinonun FİFA-dakı mövqeyini qorumaq üçün Vaşinqton administrasiyasının dəstəyinə ehtiyac duyduğu barədə də iddia irəli sürüb. Bildirilirdi ki, FİFA rəhbəri yaranmış mübahisələr fonunda Trampla dəfələrlə telefon əlaqəsi yaratmağa çalışıb.
İnfantino Dünya Kuboku ilə bağlı bəzi kommersiya hüquqlarındakı payın özəl investorlara satılması ideyasına görə tənqid edilmişdi. Məlumata görə, yaranan etirazlardan sonra FİFA rəhbəri həmin təşəbbüsdən geri çəkilib.
Trampın son bəyanatı isə İnfantino ətrafında gedən müzakirələr fonunda ona verilmiş olduqca açıq siyasi dəstək kimi diqqət çəkir. ABŞ Prezidentinin fikrincə, FİFA-nın hazırkı rəhbərlə yoluna davam etməsi dünya futbolunun gələcək böyük turnirlərinin uğuru baxımından vacibdir.
Geri dön