Alimlərdən yeni kəşf: Yuxusuzluğun səbəbi bağırsaqlarda ola bilər
Dünən, 23:45. Yazar: vasif
Yuxu problemləri ilə bağırsaq sağlamlığı arasında gözlənilməz əlaqə aşkarlanıb. Alimlərin apardığı yeni araşdırma göstərir ki, bağırsaq mikrobiomunda yaranan dəyişikliklər yuxusuzluğun inkişaf riskinə təsir göstərə bilər.
Tədqiqat çərçivəsində 9 mindən çox insanın sağlamlıq göstəriciləri təhlil edilib. Nəticələrə əsasən, yuxusuzluqdan əziyyət çəkən şəxslərdə bağırsaq mikrobiomunun müxtəlifliyi daha aşağı olub və faydalı bakteriyaların miqdarı nəzərəçarpacaq dərəcədə azalıb.
Mütəxəssislər bildirirlər ki, bağırsaq və beyin arasında mövcud olan bioloji əlaqə insanın yuxu keyfiyyətinə birbaşa təsir göstərə bilər. Mikrobiomun pozulması orqanizmdə iltihabi prosesləri gücləndirə, stress hormonlarının səviyyəsini dəyişdirə və təbii yuxu ritmini poza bilər.
Araşdırma müəlliflərinin fikrincə, bağırsaq sağlamlığının qorunması yalnız həzm sistemi üçün deyil, həm də keyfiyyətli yuxunun təmin olunması baxımından mühüm əhəmiyyət daşıyır. Bu səbəbdən balanslı qidalanma, liflə zəngin məhsulların qəbulu və sağlam həyat tərzi mikrobiomun qorunmasına kömək edə bilər.
Alimlər qeyd edirlər ki, mövzu ilə bağlı tədqiqatlar davam edir və gələcək araşdırmalar bağırsaq mikrobiomunun yuxu pozuntularının qarşısının alınması və müalicəsində yeni yanaşmaların formalaşmasına imkan yarada bilər.
Geri dön