Məhkəmədən Hüseyn Həsənovla bağlı qiyabi hökm: Həbs, milyonluq cərimə və əmlak müsadirəsi
Bu gün, 15:06. Yazar: vasif
Moskvanın Presnenski Rayon Məhkəməsi tanınmış bloqer Hüseyn Həsənov barəsində qiyabi hökm çıxarıb. Məhkəmənin qərarına əsasən, o, maliyyə vəsaitlərinin leqallaşdırılması (çirkli pulların yuyulması) işi üzrə 4 il müddətinə azadlıqdan məhrum edilib.
Qərara əsasən, Hüseyn Həsənov 1 milyon rubl məbləğində cərimə ödəməli olacaq. Bundan əlavə, ona iki il müddətində internet platformalarında hər hansı məzmun paylaşmaq qadağan edilib.
Məhkəmə həmçinin bloqerə məxsus, "Moskva-Siti" kompleksində yerləşən və təxminən 46 milyon rubl dəyərində qiymətləndirilən mənzilin dövlət nəfinə müsadirə olunmasına qərar verib.
İstintaq materiallarında bildirilir ki, Hüseyn Həsənov fərdi sahibkar kimi fəaliyyət göstərdiyi dövrdə 170 milyon rubldan artıq vergi ödəməkdən yayınıb. Hüquq-mühafizə orqanlarının iddiasına görə, cinayət işi məhz bu maliyyə pozuntuları əsasında başlanılıb.
Qeyd edək ki, qərar qiyabi qaydada qəbul olunub və qanunvericilik çərçivəsində müəyyən edilmiş prosedurlara uyğun şəkildə şikayət verilə bilər.
Geri dön