Günün fotosu: Ümidlə çıxılan yolun sonu...
Bu gün, 20:14. Yazar: vasif
Bu fotoya baxanda insanın yaddaşında Hüseyn Cavidin məşhur misraları canlanır:
“Nə dərd olaydı, nə dərman...
Nə öncə öylə səadət, nə böylə zillət olaydı...”
Şəkildə görünən insanlar Mərakeşdən İspaniyanın Şimali Afrikadakı Seuta eksklavına keçməyə çalışan minlərlə miqrantdan yalnız bir neçəsidir. Üzlərində yorğunluq, baxışlarında ümidsizlik, oturduqları quru torpaq isə onların keçdiyi ağır yolun səssiz şahididir.
84 min nəfərlik Seuta şəhərinə qısa müddətdə on minlərlə miqrantın axını bölgədə ciddi humanitar və təhlükəsizlik böhranı yaradıb. Rəsmi məlumatlara görə, onların böyük əksəriyyəti saxlanılaraq geri qaytarılıb, bir hissəsi isə şəhərdə gizlənərək qalmağa çalışıb.
İspaniya baş verənləri sərhəd təhlükəsizliyinə ciddi təhdid kimi qiymətləndirir. Avropa İttifaqı da xarici sərhədlərin qorunmasının vacibliyini vurğulayaraq Madriddən daha sərt tədbirlər görməyi tələb edir.
Miqrasiya dalğasının əsas səbəblərindən biri kimi sosial şəbəkələrdə yayılan yanlış məlumatlar göstərilir. İddialara görə, dəniz yolu ilə Avropaya çatan şəxslərin geri deportasiya edilməyəcəyi barədə yayılan xəbərlər minlərlə insanı riskli səfərə sövq edib.
Bu ümidsiz yol isə ağır itkilərlə nəticələnib. Rəsmi məlumatlarda onlarla insanın həyatını itirdiyi bildirilsə də, qeyri-rəsmi mənbələr ölənlərin sayının daha çox ola biləcəyini qeyd edirlər. Bir çox ailə isə hələ də itkin düşən yaxınlarının taleyindən xəbərsizdir.
Seuta küçələrində övladlarını axtaran valideynlər, sərhəd boyunca həyat uğrunda mübarizə aparan insanlar və bir tikə ümid naminə ölümə gedən gənclər bu böhranın ən ağrılı tərəfini nümayiş etdirir.
Bu hadisə bir daha göstərir ki, miqrasiya statistikadan ibarət deyil. Hər rəqəmin arxasında təhlükədən qaçmağa çalışan, daha təhlükəsiz və firavan həyat arzulayan bir insan taleyi dayanır. Ancaq o ümid yolu bəzən arzulanan gələcəyə deyil, faciəyə aparır.
Geri dön