TikTok fenomeninin canlı yayımda qətli: İstintaq kartel izinə düşdü
Bu gün, 20:00. Yazar: vasif
Meksikada TikTok canlı yayımı zamanı güllələnərək öldürülən 23 yaşlı fenomen və kosmetoloq Valeriya Markesin qətli ilə bağlı aparılan istintaqda yeni məlumatlar ortaya çıxıb.
Musavat.com xəbər verir ki, hüquq-mühafizə orqanları cinayətin ölkənin ən təhlükəli mütəşəkkil cinayət qruplarından biri hesab olunan Xalisko Yeni Nəsil Karteli (CJNG) ilə əlaqəli şəxslər tərəfindən təşkil edildiyi ehtimalını araşdırır.
İstintaq çərçivəsində kartelin yüksək rütbəli üzvlərindən biri kimi tanınan Ramon Angel Alvarez Ayalaya ("El R1") qarşı ittiham irəli sürülüb. Məlumata görə, o, Xalisko ştatında keçirilən xüsusi əməliyyat zamanı saxlanılıb.
Meksikanın Təhlükəsizlik katibi Omar Qarsiya Harfuç bildirib ki, El R1-in oğlu Fransisko Alvares mərhum Valeriya Markesin keçmiş sevgilisi olub. İddialara əsasən, o, gənc qadının öldürülməsi üçün atasından dəstək istəyib.
İstintaq materiallarında qeyd olunur ki, silahlı şəxs gözəllik salonuna kuryer kimi daxil olub. Əvvəlcə Markesin şəxsiyyətini dəqiqləşdirən hücumçu daha sonra ona yaxın məsafədən atəş açıb. Hadisə həmin an TikTok-da canlı yayımlandığından minlərlə izləyici qətli real vaxtda izləyib.
Araşdırma zamanı Valeriya Markesin ölümündən əvvəl etdiyi sosial media paylaşımları da diqqət mərkəzinə düşüb. O, həmin paylaşımlarında özünü təhlükə altında hiss etdiyini və həyatında yeni mərhələyə başlamaq istədiyini yazmışdı.
İş üzrə əvvəlki mərhələdə adı hallanan Rikardo Ruiz Velasko ("Doble R") ilə bağlı da yeni açıqlama verilib. Hüquq-mühafizə orqanları onun hadisədə iştirakını təsdiqləyən kifayət qədər sübut əldə edilmədiyini bildirərək, hazırda əsas şübhəlilər siyahısından çıxarıldığını qeyd edib.
Valeriya Markesin qətli Meksikada kartellərin təsiri, mütəşəkkil cinayətkarlıq və sosial media fenomenlərinin təhlükəsizliyi ilə bağlı müzakirələri yenidən gündəmə gətirib.
Geri dön