İran Mossadla əməkdaşlıq ittihamı ilə iki nəfəri edam etdiyini açıqladı
Bu gün, 20:15. Yazar: vasif
İran hakimiyyəti İsrailin xarici kəşfiyyat xidməti Mossad ilə əməkdaşlıq etməkdə təqsirləndirilən iki nəfərin edam olunduğunu açıqlayıb.
Rəsmi məlumatlara görə, edam edilən şəxslər Omid Behzad və Puriya Səfətidir. Onların İranın hərbi və təhlükəsizlik obyektləri barədə məxfi məlumatları və koordinatları Mossad nümayəndələrinə ötürməkdə təqsirli bilindiyi bildirilib.
İranın iddiasına əsasən, Omid Behzad hərbi və hüquq-mühafizə orqanlarına dair məlumatları müxtəlif rabitə kanalları vasitəsilə İsrail kəşfiyyatına çatdırıb.
İkinci təqsirləndirilən şəxs Puriya Səfətinin isə hərbi və təhlükəsizlik obyektlərinin koordinatlarını xarici kəşfiyyata ötürdüyü iddia olunur. İran mediası onun yazışmalarından birində Mossad nümayəndələrinə ünvanlandığı bildirilən "Təşəkkür edirəm, Musa peyğəmbərin əsgərləri!" ifadəsinin yer aldığını da yayıb.
İran hakimiyyəti bu şəxslərin casusluq fəaliyyəti ilə məşğul olduqlarını bildirir. Bununla yanaşı, ittihamlarla bağlı müstəqil təsdiq və ya beynəlxalq mənbələr tərəfindən əlavə təsdiqləyici məlumat hələlik təqdim olunmayıb.
Geri dön