Ərdoğan: Türkiyə Cənubi Livanda təhlükəsizlik və bərpa təşəbbüslərinə dəstəyə hazırdır
Bu gün, 14:20. Yazar: vasif
Türkiyə Prezidenti Rəcəb Tayyib Ərdoğan Ankarada Livan Prezidenti Cozef Aun ilə keçirdiyi görüşdən sonra bildirib ki, Ankara BMT-nin Livandakı Müvəqqəti Qüvvələrinin (UNIFIL) missiyası başa çatdıqdan sonra Cənubi Livanda təhlükəsizliyin təmin olunmasına yönəlmiş təşəbbüslərdə iştirak etməyə hazırdır.
Ərdoğan qeyd edib ki, UNIFIL missiyasının yekunlaşmasından sonra Livanın suverenliyinin qorunması və bölgədə sabitliyin möhkəmləndirilməsi istiqamətində həyata keçiriləcək beynəlxalq təşəbbüslərə Türkiyə də töhfə vermək niyyətindədir.
Türkiyə Prezidenti, həmçinin Ankara hökumətinin Livan Silahlı Qüvvələrinə təhlükəsizlik sahəsində dəstəyini davam etdirəcəyini bildirib. Onun sözlərinə görə, Türkiyə ölkənin müdafiə imkanlarının gücləndirilməsinə yönəlmiş əməkdaşlığa önəm verir.
Ərdoğan İsrailin hərbi əməliyyatlarından zərər çəkmiş Cənubi Livanın yenidən qurulmasına Türkiyənin dəstək verməyə hazır olduğunu vurğulayıb. O əlavə edib ki, humanitar və texniki yardım proqramları, eləcə də dövlət institutlarının gücləndirilməsinə yönəlmiş layihələr davam etdiriləcək.
Görüş zamanı Livan-Suriya münasibətlərinin gələcəyi də müzakirə olunub. Türkiyə Prezidenti iki qonşu ölkə arasında dialoqun inkişafının regionda sabitliyə töhfə verəcəyini bildirib və Ankaranın bu prosesə dəstək göstərməyə hazır olduğunu qeyd edib.
Livan Prezidenti Cozef Aun isə səfərin iki ölkə arasında əməkdaşlığın genişlənməsi üçün yeni imkanlar yaradacağına inandığını bildirib. O, iqtisadiyyat, təhlükəsizlik və müharibədən zərər çəkmiş ərazilərin bərpası istiqamətində Türkiyə ilə əlaqələrin inkişafının əhəmiyyətini vurğulayıb.
Geri dön