Axios: Tramp və Netanyahu İranla bağlı üç mümkün ssenarini müzakirə edib
Bu gün, 19:32. Yazar: vasif
ABŞ Prezidenti Donald Trampla İsrailin Baş naziri Binyamin Netanyahu arasında keçirilən görüşdə İranla bağlı mümkün siyasət variantları müzakirə olunub. Axios nəşrinin İsrail rəsmisinə istinadən yaydığı məlumata görə, tərəflər diplomatik razılaşma, iqtisadi təzyiqlərin gücləndirilməsi və hərbi əməliyyatların bərpası olmaqla üç əsas ssenarini nəzərdən keçiriblər.
Nəşrin məlumatına görə, Netanyahu İranla yeni diplomatik razılaşmanın effektivliyinə şübhə ilə yanaşdığını bildirib və Tehrana qarşı təzyiqlərin artırılmasının vacibliyini vurğulayıb. Məlumata əsasən, müzakirələr zamanı İranın nüvə proqramı və regional fəaliyyəti əsas gündəm mövzularından olub.
Siyasi şərhçi Əli Orucov hesab edir ki, hazırkı geosiyasi şəraitdə diplomatik razılaşma Vaşinqton üçün ən az riskli ssenarilərdən biri sayılsa da, onun reallaşması Tehranın nüvə proqramı və beynəlxalq nəzarət mexanizmləri ilə bağlı mümkün güzəştlərindən asılıdır. Onun fikrincə, İsrail rəhbərliyi isə bu varianta ehtiyatla yanaşır.
Ekspertin sözlərinə görə, hazırkı mərhələdə ən real görünən seçim iqtisadi və siyasi təzyiqlərin daha da artırılmasıdır. O hesab edir ki, bu yanaşma hərbi qarşıdurmaya getmədən İranın maliyyə imkanlarını və regional təsirini məhdudlaşdırmağa yönəlib.
Əli Orucovun fikrincə, hərbi əməliyyatların yenidən başlaması isə ən yüksək risk daşıyan ssenaridir. O bildirib ki, belə bir addım İranın mümkün cavab tədbirlərinə, Hörmüz boğazında gərginliyin artmasına və enerji bazarlarında ciddi dalğalanmalara səbəb ola bilər. Ekspert bu səbəbdən hərbi variantın yalnız digər vasitələrin nəticə vermədiyi halda gündəmə gələ biləcəyini düşünür.
Qeyd edək ki, Axios-un yaydığı məlumat və ekspert rəyi tərəflərin mümkün siyasət variantlarına dair qiymətləndirmələri əks etdirir. ABŞ administrasiyası və İsrail hökuməti İranla bağlı gələcək strategiyaya dair rəsmi qərar açıqlamayıb.
Geri dön