Bloomberg: ABŞ-da neft emalı son illərin zirvəsinə yüksəldi, benzin qiymətlərində isə ciddi eniş gözlənilmir
Bu gün, 18:19. Yazar: vasif
ABŞ-da neft emalı zavodları fəaliyyətini son illərin ən yüksək səviyyəsinə çatdırsa da, bu artımın yaxın müddətdə benzin qiymətlərini əhəmiyyətli dərəcədə aşağı salacağı gözlənilmir. Bu barədə Bloomberg ABŞ Enerji İnformasiya Administrasiyasının (EIA) məlumatlarına istinadən xəbər yayıb.
Məlumata görə, ölkədə neft emalı müəssisələri ötən həftə sutkada təxminən 17 milyon barel xam neft emal edib. Bu göstərici 2019-cu ilin sentyabrından bəri qeydə alınan ən yüksək həftəlik orta həcm hesab olunur.
Bloomberg yazır ki, qlobal enerji bazarında davam edən geosiyasi gərginliklər və tədarük riskləri yanacaq ehtiyatlarının məhdud qalmasına təsir göstərir. Nəşrin qiymətləndirməsinə görə, bu amillər emal həcminin artmasına baxmayaraq qiymətlər üzərində təzyiqin davam etməsinə səbəb olur.
Konsaltinq şirkəti Kpler-in analitiki Mett Smit bildirib ki, yüksək emal marjaları neft emalı zavodlarını maksimum güclə işləməyə sövq edir. Onun sözlərinə görə, bu proses xam neft ehtiyatlarının daha sürətlə azalmasına gətirib çıxarır.
Milli Avtomobil Assosiasiyasının (AAA) məlumatına əsasən, hazırda ABŞ-da bir qallon benzinin orta qiyməti 4,10 dollar təşkil edir. Müqayisə üçün, bir ay əvvəl bu göstərici 3,80 dollar idi. Bloomberg hesab edir ki, mövcud bazar şəraitində yaxın perspektivdə yanacağın qiymətində nəzərəçarpacaq ucuzlaşma ehtimalı yüksək deyil.
Geri dön