ÜST: Profilaktik tədbirlər gücləndirilməzsə, 2050-ci ilədək xərçəng hallarının sayı arta bilər
Bu gün, 19:00. Yazar: vasif
Ümumdünya Səhiyyə Təşkilatı (ÜST) və Beynəlxalq Xərçəng Araşdırmaları Agentliyinin (IARC) birgə hesabatında bildirilir ki, effektiv profilaktika və erkən diaqnostika tədbirləri genişləndirilməzsə, 2050-ci ilə qədər dünyada hər il qeydə alınan yeni xərçəng hallarının sayı təxminən 35 milyona çata bilər.
Hesabatda qeyd olunur ki, xərçəng ürək-damar xəstəliklərindən sonra dünyada ölümə ən çox səbəb olan xəstəliklərdən biridir. Mütəxəssislərin məlumatına görə, ağciyər, süd vəzi və yoğun bağırsaq xərçəngi ən geniş yayılmış növlər sırasında yer alır. Son illərdə bəzi xərçəng növlərinin daha gənc yaş qruplarında da müşahidə olunması diqqət çəkən tendensiya kimi qiymətləndirilir.
Sənəddə ölkələr arasında müalicə və diaqnostika imkanlarındakı fərqlərin ciddi problem olaraq qaldığı vurğulanır. Məsələn, inkişaf etmiş ölkələrdə süd vəzi xərçəngi üzrə beşillik sağqalma göstəricisi daha yüksək olduğu halda, aşağı gəlirli ölkələrdə bu göstərici əhəmiyyətli dərəcədə aşağıdır. Erkən diaqnostika və müasir müalicəyə çıxış imkanlarının məhdud olması ölüm riskini artıran əsas amillərdən biri hesab edilir.
ÜST və IARC ekspertləri bildirirlər ki, xərçəng hallarının təxminən 40 faizinin qarşısını sağlam həyat tərzi və profilaktik tədbirlərlə almaq mümkündür. Siqaretdən imtina, alkoqol istifadəsinin məhdudlaşdırılması, fiziki aktivliyin artırılması, sağlam qidalanma, peyvənd proqramları və ətraf mühit risklərinin azaldılması əsas tövsiyələr sırasındadır.
Hesabat müəllifləri erkən diaqnostika xidmətlərinin genişləndirilməsinin, əsas onkoloji dərmanlara çıxışın yaxşılaşdırılmasının və xərçəng müalicəsinin universal səhiyyə təminatı proqramlarına daha geniş inteqrasiya edilməsinin gələcək illərdə xəstəliyin yükünün azaldılması baxımından mühüm əhəmiyyət daşıdığını vurğulayırlar.
Geri dön