Ermənistanın mümkün referendumu ilə bağlı müzakirələr davam edir
Bu gün, 19:16. Yazar: vasif
Ermənistanın "Hraparak" nəşri yazır ki, Moskva İrəvana ölkənin xarici siyasət prioritetləri ilə bağlı referendum keçirilməsi təklifini irəli sürüb. Nəşrin iddiasına görə, referendumda Ermənistanın Avrasiya İqtisadi Birliyində (AİB) qalması və ya Avropa İttifaqı ilə inteqrasiya istiqamətində irəliləməsi kimi məsələlər müzakirə oluna bilər.
Qəzetin məlumatına əsasən, Baş nazir Nikol Paşinyan referendumun keçirilməsini istisna etməsə də, bunun daha uyğun vaxtda baş tuta biləcəyini bildirib. Rəsmi İrəvan bu iddialarla bağlı açıqlama verməyib.
Məqalədə həmçinin qeyd olunur ki, Ermənistanın xarici siyasi kursu və təhlükəsizlik məsələləri ölkə daxilində geniş ictimai müzakirə mövzusu olaraq qalır. Nəşr referendumun vaxtı və mümkün nəticələri ilə bağlı müxtəlif ehtimallar irəli sürür.
Mövzunu şərh edən ƏHD Partiyasının baş katibi Niyaməddin Orduxanlı bildirib ki, Ermənistan Konstitusiyasında dəyişikliklərin referendum yolu ilə həyata keçirilməsi Azərbaycanla münasibətlərin normallaşması baxımından əhəmiyyət daşıya bilər. Onun fikrincə, bu məsələ gələcək sülh prosesinə təsir göstərə biləcək amillərdən biridir.
Ekspert həmçinin hesab edir ki, Ermənistanın həm Qərb, həm də Rusiya ilə münasibətlərini balanslaşdırmağa çalışması qərarların qəbuluna təsir edən amillərdəndir. Onun sözlərinə görə, regiondakı geosiyasi maraqlar da sülh prosesinin sürətinə təsir göstərən faktorlar sırasında yer alır.
Ermənistan hökuməti referendumun keçirilməsi ilə bağlı rəsmi tarix və ya qərar açıqlamayıb. Mövzu ətrafında müzakirələr isə həm ölkə daxilində, həm də regional səviyyədə davam edir.
Geri dön