Türkiyə S-400 sistemləri ilə bağlı üçüncü ölkələrlə danışıqlar aparıldığını açıqlayıb
Dünən, 21:41. Yazar: vasif
Türkiyənin milli müdafiə naziri Yaşar Gülər Rusiyadan alınmış S-400 hava hücumundan müdafiə sistemləri ilə bağlı üçüncü ölkələrlə müzakirələrin davam etdiyini bildirib.
Nazirin sözlərinə görə, ABŞ ilə hərbi və siyasi sahələrdə davam edən dialoq çərçivəsində keçmişdən qalan və üçüncü ölkələri də maraqlandıran məsələlər üzrə qarşılıqlı anlaşmaya əsaslanan həll variantları nəzərdən keçirilir.
Yaşar Gülər açıqlamasında S-400 sistemlərinin təkrar ixracı ilə bağlı danışıqların aparıldığını qeyd etsə də, hər hansı ölkə ilə razılaşmanın əldə olunduğunu və ya satış qərarının qəbul edildiyini bildirməyib.
Xatırladaq ki, Türkiyənin Rusiyadan S-400 hava hücumundan müdafiə sistemləri alması Ankara ilə Vaşinqton arasında gərginliyə səbəb olmuşdu. Bundan sonra ABŞ Türkiyəni F-35 qırıcı proqramından çıxarmış və iki ölkə arasında müdafiə sahəsində əməkdaşlıq yeni müzakirə mərhələsinə keçmişdi.
Hazırda S-400 sistemlərinin mümkün gələcəyi ilə bağlı danışıqların hansı nəticə verəcəyi barədə rəsmi qərar açıqlanmayıb.
Geri dön