Polşa şərq sərhədlərində yeni hərbi birlik yaradır
Dünən, 21:14. Yazar: vasif
Polşa hökuməti ölkənin şərq və şimal-şərq sərhədlərində təhlükəsizliyin gücləndirilməsi məqsədilə yeni **Sərhəd Müdafiə Komponenti**nin (Border Defense Component) yaradıldığını açıqlayıb. Yeni struktur Rusiya və Belarusla həmsərhəd ərazilərdə fəaliyyət göstərəcək və "Şərq Qalxanı" (East Shield) proqramının tərkib hissəsi olacaq.
Polşanın müdafiə naziri və baş nazirin müavini Vladislav Kosinyak-Kamışın sözlərinə görə, yeni birlik hibrid təhdidlərə, qeyri-qanuni miqrasiyaya, pilotsuz uçuş aparatlarından qaynaqlanan risklərə qarşı fəaliyyət göstərəcək, həmçinin sərhəd infrastrukturunun mühafizəsində iştirak edəcək.
Məlumata əsasən, yeni struktur Polşanın Ərazi Müdafiə Qüvvələrinin sərhəd bölgələrində yerləşən dörd briqadasını birləşdirəcək. Bölmələr Sərhəd Mühafizəsi Xidməti ilə koordinasiyalı işləyəcək, kəşfiyyat, müşahidə, fövqəladə hallara reaksiya və pilotsuz sistemlərə qarşı mübarizə imkanlarını gücləndirəcək. Gələcəkdə bu komponentin 15 mindən çox hərbçidən ibarət olması planlaşdırılır.
Rəsmi Varşava bildirir ki, təşəbbüsün əsas məqsədi Polşanın milli təhlükəsizliyini möhkəmləndirmək və NATO-nun şərq cinahının müdafiə qabiliyyətini artırmaqdır. Layihə çərçivəsində sərhəd boyunca istehkamlar, anbarlar, pilotsuz uçuş aparatları və antidron sistemlərinin inkişafı da nəzərdə tutulur.
Son illərdə Polşa Rusiya və Belarusla sərhəddə müdafiə imkanlarının genişləndirilməsinə milyardlarla zlotı vəsait ayırıb. Yeni hərbi birlik də bu strategiyanın davamı kimi qiymətləndirilir və regionda dəyişən təhlükəsizlik mühitinə cavab tədbirlərindən biri hesab olunur.
Geri dön