Macarıstanda siyasi böhran: Baş nazir prezidentə iyulun 18-dək vaxt verdi
Bu gün, 19:14. Yazar: vasif
Macarıstanda prezident Tamaş Şuyokun vəzifədən uzaqlaşdırılmasını nəzərdə tutan konstitusiya dəyişikliyi ətrafında siyasi gərginlik artır. Baş nazir Peter Madyar bildirib ki, dövlət başçısı parlamentin qəbul etdiyi sənədi iyulun 18-dən gec olmayaraq imzalamalıdır.
Parlament 17-ci konstitusiya düzəlişini iyulun 13-də qəbul edib. Mövcud qaydalara əsasən, prezidentin sənədi imzalaması və ya prosedur pozuntusu olduğunu düşündüyü halda Konstitusiya Məhkəməsinə müraciət etməsi üçün beş gün vaxtı var.
Peter Madyarın sözlərinə görə, prezident sənədi nəzərdə tutulan müddətdə təsdiqləməsə, ona qarşı impiçment və ya vəzifədən kənarlaşdırılma prosedurunun başladılması gündəmə gələ bilər. Baş nazir düzəlişin qəbulunda hər hansı ciddi prosedur pozuntusunun olmadığını hesab etdiyini bildirib.
Qəbul edilən dəyişiklik Tamaş Şuyokun prezidentlik müddətinin başa çatdırılmasını və parlament tərəfindən yeni dövlət başçısının seçilməsini nəzərdə tutur. Hakimiyyət bunu ölkədə konstitusion və siyasi sistemin yenilənməsi istiqamətində atılan addım kimi təqdim edir.
Müxalifət isə prezidentin konstitusiya dəyişikliyi yolu ilə vəzifədən uzaqlaşdırılmasını sərt tənqid edir. Tənqidçilər prosesin sürətlə aparıldığını və hakim çoxluğun dövlət institutları üzərində təsirini artırdığını bildirirlər.
Prezident sənəddə prosedur pozuntusu aşkarlayarsa, onu şərhləri ilə birlikdə Konstitusiya Məhkəməsinə göndərə bilər. Peter Madyar belə bir addım üçün hüquqi əsas olmadığını düşündüyünü və fərqli ssenari yaranacağı təqdirdə hökumətin lazımi tədbirləri görəcəyini vurğulayıb.
Geri dön