Misir də həmin gəmini ərazisinə buraxmadı
Bu gün, 15:13. Yazar: Subhan
Misir də LGBTQ+ icması turistlərinə xidmət göstərən “Scarlet Lady” kruiz gəmisinin ölkənin ərazi sularına daxil olmasına icazə verməyib.
aia.az xəbər verir ki, bu barədə “Guardian” nəşri məlumat yayıb.
Kruizi təşkil edən “Atlantis Events” şirkəti göyərtəsində təxminən 2000 nəfərədək turist olan laynerin Misir sularına daxil olmaq üçün icazə ala bilmədiyini və bu səbəbdən İsgəndəriyyəyə planlaşdırılan səfərin ləğv edildiyini açıqlayıb.
Təşkilatçılar ötən il oxşar marşrutda səfərin problemsiz təşkil edildiyini və Misir tərəfinin builki qərarının onlar üçün gözlənilməz olduğunu bildiriblər.
Misir hakimiyyəti isə qadağa ilə bağlı hələlik rəsmi açıqlama verməyib.
Marşrut dəyişikliyindən sonra “Scarlet Lady” Krit adasına istiqamət alacaq, sonra isə Monteneqronun Kotor limanına yola düşəcək.
Qeyd edək ki, “Athens to Venice” kruizi iyulun 5-də start götürüb. Ötən həftə Türkiyə hakimiyyəti də gəminin ölkə limanlarına yan almasına icazə verməmişdi. Məhz bundan sonra kruiz gəmisi Misir və Yunanıstandakı alternativ istiqamətlərə yönəldilmişdi.
Geri dön