NATO-da yeni maliyyə mərhələsi: 9 ölkə müdafiə bankı yaratmaq üçün razılaşdı
Dünən, 22:00. Yazar: vasif
Ankarada keçirilən NATO Liderlər Zirvəsində müdafiə və təhlükəsizlik sahəsində yeni maliyyə mexanizminin yaradılması istiqamətində mühüm addım atılıb. Türkiyə də daxil olmaqla doqquz ölkə Müdafiə, Təhlükəsizlik və Dayanıqlılıq Bankının yaradılması ilə bağlı birgə niyyət bəyannaməsi imzalayıb.
Razılaşmaya Türkiyə, Kanada, Albaniya, Belçika, Yunanıstan, Latviya, Lüksemburq, Rumıniya və Ukrayna qoşulub. Məlumata görə, yeni bankın 2027-ci ildən fəaliyyətə başlaması, baş qərargahının isə Kanadada yerləşməsi planlaşdırılır.
Yeni maliyyə institutunun əsas missiyası müdafiə, təhlükəsizlik və dayanıqlılıq sahələrində həyata keçirilən layihələri uzunmüddətli və aşağı faizli maliyyə resursları ilə təmin etməkdir. Bankın həm üzv dövlətlərə, həm də müdafiə sənayesində fəaliyyət göstərən kiçik və orta sahibkarlıq subyektlərinə maliyyə dəstəyi verməsi nəzərdə tutulur.
Layihə çərçivəsində müdafiə sənayesində maliyyə çatışmazlığının azaldılması, istehsal və təchizat zəncirinin gücləndirilməsi, eləcə də müdafiə layihələri üçün kapitala çıxışın asanlaşdırılması əsas prioritetlər kimi müəyyənləşdirilib.
Bundan əlavə, yeni bankın kommersiya banklarından maliyyə cəlb etməkdə çətinlik çəkən müdafiə şirkətləri üçün zəmanət mexanizmləri təqdim edəcəyi və NATO üzvlərinin müdafiə xərcləri üzrə öhdəliklərinin yerinə yetirilməsinə dəstək verəcəyi gözlənilir.
Geri dön