Rusiya şirkətlərinin borc yükü tarixi maksimuma yüksəldi
Bu gün, 19:00. Yazar: vasif
Rusiyada şirkətlərin vaxtı keçmiş maliyyə öhdəlikləri son bir ildə kəskin artaraq rekord həddə çatıb. Məlumatlara görə, ümumi gecikmiş borcların həcmi 7 trilyon rubla yüksəlib ki, bu da ölkə tarixində qeydə alınan ən yüksək göstəricilərdən biridir.
Söhbət yalnız bank kreditlərindən deyil, həm də müəssisələrin təchizatçılar, əməkdaşlar və vergi orqanları qarşısında yerinə yetirilməmiş öhdəliklərindən gedir.
Ən böyük borc yükü emal sənayesinin payına düşür. Bu sahədə gecikmiş öhdəliklərin həcmi 2,5 trilyon rubla yaxınlaşıb. Sonrakı yerlərdə ticarət, mədən sənayesi və tikinti sektoru qərarlaşıb.
İqtisadçılar bildirirlər ki, istehlak tələbinin zəifləməsi, vergi yükünün artması və yüksək faiz dərəcələri şirkətlərin maliyyə dayanıqlığını ciddi şəkildə zəiflədib. Onların fikrincə, 2026-cı ildən tətbiq edilən yeni vergi dəyişiklikləri də biznesin üzərindəki yükü daha da artırıb.
Mütəxəssislər qeyd edirlər ki, yüksək baza faiz dərəcəsi mövcud kreditlərin yenidən maliyyələşdirilməsini çətinləşdirir. Bu səbəbdən bir çox şirkət əvvəlki borclarını ödəmək üçün yeni kreditlər götürmək məcburiyyətində qalır.
Ekspertlərin qiymətləndirməsinə görə, borc yükünün sürətlə artması Rusiya iqtisadiyyatı üçün ciddi risklər yaradır. Bildirilir ki, 2026-cı ilin ilk rübündə ölkənin ümumi daxili məhsulu azalıb, şirkətlərin mənfəəti isə əhəmiyyətli dərəcədə geriləyib.
İqtisadçılar xəbərdarlıq edirlər ki, mövcud tendensiya davam edərsə, maliyyə çətinlikləri yaşayan müəssisələrin sayının artması və bəzi şirkətlərin müflisləşməsi ehtimalı yüksələ bilər.
Geri dön