İsraildən İrana sərt mesaj: "Lazım gələrsə, təkbaşına hərəkət edəcəyik"
Bu gün, 18:37. Yazar: vasif
İsrailin müdafiə naziri İsrael Kats ölkəsinin təhlükəsizliyinə yönələn risklər yaranacağı təqdirdə ordunun İrana qarşı müstəqil hərbi əməliyyat keçirməyə hazır olması lazım olduğunu bəyan edib.
Nazirin sözlərinə görə, İsrail Silahlı Qüvvələri istənilən potensial təhdidi zərərsizləşdirmək üçün bütün mümkün ssenarilərə hazır olmalıdır. O bildirib ki, ölkənin müdafiə strategiyası hər hansı xarici dəstəkdən asılı olmadan milli təhlükəsizliyin təmin edilməsinə əsaslanır.
İsrael Kats, həmçinin son qarşıdurmalar zamanı İsrailin İranın hərbi və strateji imkanlarına ciddi zərbələr endirdiyini iddia edərək, bunun ölkəsinin müdafiə potensialını nümayiş etdirdiyini vurğulayıb.
Bundan əvvəl İranın xarici işlər naziri Abbas Əraqçi İsraili təhdid xarakterli bəyanatlardan çəkinməyə çağırmışdı. O bildirmişdi ki, İrana qarşı istənilən addım və ya təhdid dərhal və qəti cavabla qarşılanacaq.
Qarşılıqlı sərt açıqlamalar fonunda iki ölkə arasında gərginliyin yüksək səviyyədə qalması regiondakı təhlükəsizlik vəziyyəti ilə bağlı narahatlıqları artırmaqda davam edir.
Geri dön